На базе Дома моладзі праходзіць Мінскі гарадскі адукацыйны форум педагагічных работнікаў «Сталічная адукацыя: час канструктыўнага ўзаемадзеяння і развіцця», перадае БелТА.
«Сістэма сталічнай адукацыі гатова да пачатку навучальнага года, — пра гэта журналістам заявіла старшыня камітэта па адукацыі Мінгарвыканкама, член Савета Рэспублікі Нацыянальнага сходу Марына Ільіна. — На працягу ўсяго лета мы рыхтавалі ўстановы адукацыі да новага сезона, вельмі шмат ажыццёўлена рамонтных работ — капітальных, бягучых, і, вядома, мы думалі пра тое, якія традыцыі захаваць і якія інавацыйныя праекты ўкараняць. Мы захоўваем нашы школьныя тэатры, захоўваем праект „Пра адукацыю і не толькі“, які даў магчымасць дзецям разважаць пра палітычныя падзеі ў краіне, пра тое, чым яны могуць сёння дапамагчы ў росквіце Беларусі. Вядома, ёсць і новыя праекты».
Адным з найважнейшых стане праект «Мінская школа — разам без крыўд». «Ён будзе спрыяць добразычліваму асяроддзю ва ўстановах адукацыі. Мы разумеем, што праблема булінгу ёсць у нашых дзіцячых калектывах. На гэту работу будзе накіравана шмат намаганняў, пройдуць навучанне педагогі, арганізуюць класныя гадзіны ў дзіцячых калектывах. Таксама мы прыцягваем бацькоўскую супольнасць і спадзяёмся, што вынікам гэтага праекта будуць усмешкі на тварах нашых дзяцей. Вядома, мы не забываем, што 2025-ы — год 80-годдзя Перамогі. І тыя праекты, якія мы пачалі, па вывучэнні нашай гісторыі, па ўвекавечанні памяці нашых продкаў будуць працягнуты і ў новым навучальным годзе. У нас добра развіты алімпіядны рух, і наша задача — не страціць пазіцыі ў горадзе. Мы адзначаем выдатнае выступленне мінскіх хлопчыкаў і дзяўчынак на міжнародных алімпіядах, але таксама разумеем, што сталічная адукацыя можа больш. Яшчэ з новага — з верасня мы пачынаем рыхтавацца да конкурсу „Настаўнік года Беларусі — 2026“ і разумеем, што ў нас ёсць усе шанцы добра выступіць», — праінфармавала старшыня камітэта.
Паводле яе слоў, у галіну прыходзіць шмат маладых спецыялістаў, ім удзяляецца асаблівая ўвага. «Сёння на жнівеньскім форуме кожнаму маладому спецыялісту будуць падораны пуцяводныя кнігі з рэкамендацыямі, як уваходзіць у школьнае жыццё. Гэта распрацоўка маладога настаўніка. Маладыя спецыялісты сёння ўключаны ў дзейнасць. Яны знаходзяцца «пад наглядам» педагогаў-настаўнікаў, падтрымліваюцца на ўсіх узроўнях. Нам вельмі важна, каб маладыя спецыялісты замацоўваліся як у галіне, так і на першых працоўных месцах», — падкрэсліла Марына Ільіна.
