Першы этап стартаваў у Нацыянальнай бібліятэцы. Перад удзельнікам стаяла ўзыходжанне да вяршыні будынка — на вышыню 73 метраў, 24 паверхі і больш за 300 прыступак. Лепшы час паказалі прадстаўнікі Мінскага раёна: ім удалося пераадолець гэтае заданне за 2 хвіліны 17 секунд. А гэта ж не проста ўздым, а сапраўдны забег мужнасці, дзе кожны крок адклікаецца рэхам рашучасці. Поўная экіпіроўка, як сімвал нязломнай волі, і балон са сціснутым паветрам вагой не менш за 20 кілаграмаў — верны спадарожнік у гэтым выпрабаванні.

«У выпадку пажару ў шматпавярховых будынках выкарыстанне ліфта строга забаронена. Таму нашы смелыя ратавальнікі падымаюцца па лесвіцы, пераадольваючы цяжкасці на шляху да ліквідацыі надзвычайных сітуацый і ратавання людзей, несучы на сабе цяжкае абсталяванне. Менавіта з гэтай прычыны мы арганізуем такія спаборніцтвы — для развіцця вынослівасці і ўмацавання маральнай устойлівасці нашых работнікаў», — растлумачыў нюансы спаборніцтваў старшы інспектар аддзела службы і боегатоўнасці падраздзяленняў Мінскага абласнога ўпраўлення МНС Аляксей Шарамет. 

У кожнай камандзе — два ратавальнікі, два сэрцы, якія б’юцца ва ўнісон. На стартавай лініі адчуваецца не проста напружанне, а хутчэй — сабранасць, вывастраная гадамі трэніровак, і высокая канцэнтрацыя ўвагі, нібы лазерны прамень, пранізвае гарызонт маючай адбыцца задачы. Наперадзе — вертыкальны марафон, дзе кожная секунда мае значэнне, і дзе перамога — гэта не толькі асабісты трыумф, але і пацвярджэнне гатоўнасці прыйсці на дапамогу ў любой сітуацыі.

«За два тыдні пачалі падрыхтоўку да першага этапу — гэта фізічная падрыхтоўка, пад’ём па лесвічных маршах на сілу і цягавітасць, трэніравалі ногі», — расказвае Ягор Каханоўскі, прадстаўнік Маладзечанскага раёна.

Пасля прыбыцця да фінішнай прамой сваімі ўражаннямі падзяліўся прадстаўнік Нясвіжскага раёна Дзяніс Яцук: «Падымаюся не ўпершыню, бегаў і ва ўніверсітэце. Спачатку ўсё адносна нескладана. А вось на ўзроўні прыкладна 15-га паверха сілы патроху пачынаюць пакідаць. Акісляюцца мышцы, моцна павялічваецца частата пульса, адчуваецца лімітавая фізічная нагрузка. Але на тое мы і ратавальнікі: трымаеш сябе ў руках, церпіш да канца. Бо калі я здамся ў рамках спаборніцтваў, то магу падвесці каманду. А ў рэальным жыцці магу не паспець да чалавека, які апынуўся ў бядзе. Трэба працаваць да апошняга».

Другі этап спаборніцтваў разгарнуўся на базе пажарнай аварыйна-ратавальнай часці ў вёсцы Шчытомірычы Мінскага раёна. Тут ратавальнікі дэманстравалі свае навыкі работы з альпінісцкім рыштункам, апускаючыся ў свет адрэналіну і гераізму. «На дадзеным этапе адпрацоўваюцца элементы хуткаснага альпінізму. Тут выконваюцца такія дзеянні, як пад’ём і спуск па вяроўцы, пад’ём грузу і зняцце пацярпелага, які завіс на вяроўках. Гэты этап вельмі важны для ратавальнікаў у іх паўсядзённай працы, асабліва ў сучасных умовах, дзе шмат вышынных будынкаў і розных камунікацый, якія ўстанаўліваюцца з дапамогай пад’ёмнікаў. Бываюць выпадкі, калі людзі зрываюцца і застаюцца завіслымі. Толькі з выкарыстаннем альпінісцкага рыштунку можна выратаваць такіх пацярпелых. Я ўдзельнічаю ў такіх спаборніцтвах вельмі часта, і гэта яшчэ адзін шанец пацвердзіць свае навыкі і даказаць, што я здольны на многае», — адзначыў Ігар Іванскі, прадстаўнік каманды пажарна-аварыйнага ратавальнага атрада Мінскага абласнога ўпраўлення МНС.

Па выніках спаборніцтваў каманда Мінскага раённага аддзела па НС стала пераможцам, серабро — у каманды пажарнага аварыйна-ратавальнага атрада, трэцяе месца заваявала каманда Салігорскага гарадскога раённага аддзела па НС. Дыпломы і медалі пераможцам уручыў начальнік Мінскага РАНС Максім Шыхалёў.

Ганаровае першае месца ў асабістым заліку заняў Дзмітрый Мікалаевіч, прадстаўнік Мінскага РАНС. Другое месца — у Дзяніса Рамейкі, прадстаўніка Мінскага РАНС. Бронзу забраў Яўген Снапко, прадстаўнік каманды пажарна-аварыйнага ратавальнага атрада Мінскага абласнога ўпраўлення МНС. Пераможцы і прызёры спаборніцтваў увойдуць у склад зборнай каманды і прадставяць Мінскае абласное ўпраўленне на прэстыжным конкурсе прафесійнага майстэрства «Лепшы ратавальнік-вышыннік падраздзяленняў па надзвычайных сітуацыях Рэспублікі Беларусь».

Фота МНС