Каралевай прыгажосці на конкурсе «Краса Беларусі — 2026» стала мама траіх дзяцей з Мінска Ганна Мацкевіч. Карону пераможцы ўручыла «Краса Беларусі — 2025 » Вольга Гарачава. Першай віцэ-місіс «Краса Беларусі-2026» стала Кацярына Шантар з Мінскага раёна, другой віцэ-місіс — Ала Богдан з Брэста.
Журы (у складзе якога былі выключна мужчыны, а ўзначаліў яго міністр культуры Беларусі Марат Маркаў) выбрала гэтых шматдзетных мам сярод 23 фіналістак з усёй краіны.
Конкурс прыгажосці «Краса Беларусі» сёлета праходзіць ужо шосты раз, яго ўдзельніцы — шматдзетныя мамы, якія актыўна заяўляюць аб сваіх жыццёвых мэтах і задачах, імкнуцца быць прыкладам для сваіх дзяцей. Арганізатарам праекта ў гэтым годзе выступіў ГА «Беларускі саюз жанчын» пры падтрымцы Міністэрства культуры Беларусі, Мінгарвыканкама і абласных выканаўчых камітэтаў.
— Беларускія жанчыны актыўна ўключаюцца ва ўсе сферы жыцця грамадства. Ім хочацца праявіць і паказаць сябе. На конкурс сёлета мы атрымалі рэкордныя 270 заявак, гэта небывалы водгук, — падкрэсліла старшыня грамадскага аб’яднання «Беларускі саюз жанчын» Вольга Шпілеўская. — Як старшыня БСЖ, я бачу нашу галоўную місію ў тым, каб аб’ядноўваць жанчын і адкрываць для іх новыя пляцоўкі. І сённяшні фінал — толькі першы крок. Дзяўчаты знаёмяцца, пачынаюць сябраваць сем’ямі і запускаюць сумесныя добрыя сацыяльныя праекты. Ім проста трэба даць імпульс і паказаць, што побач ёсць аднадумцы. А далей яны ўсё робяць самі.
Ганна Мацкевіч — мама траіх дзяцей-погодок, намеснік дэкана па ідэалагічнай і выхаваўчай рабоце факультэта грамадзянскай авіяцыі Беларускай дзяржаўнай акадэміі авіяцыі. На конкурсе яна прадстаўляла Мінск, але падкрэсліла, што заўсёды памятае пра сваю малую радзіму, горад Лунінец, і палескія карані.
— Кожная з нас, — сказала яна пра канкурсантак, з якімі правяла 7 дзён падрыхтоўкі да фіналу, — захоўвае ў душы не толькі матчыну любоў, але і любоў да свайго горада, роднага краю, якой дзялілася з усімі, хто быў датычны да гэтага конкурсу. Я б хацела, — звярнулася Ганна да гледачоў — каб кожны з вас прыехаў у госці ў той горад, дзе нарадзіўся, патэлефанаваў маме, прыехаў да бабулі. І памятаў тое месца, адкуль вы родам.
Пераможца распавяла, што яны з мужам гадуюць дзяцей у любові і згодзе, выхоўваюць асабістым прыкладам.
— Я шматдзетная мама ў чацвёртым пакаленні, і заўсёды ведала, што ў мяне будзе шмат дзяцей. Яны займаюцца спортам і творчасцю. Будзем гадаваць здаровае пакаленне для нашай дарагой Беларусі, — дадала яна.
Мацярынства, і, асабліва, шматдзетнасць, робіць жанчыну мудрэй, мацней, прыгажэй, дорыць упэўненасць і неверагодную энергію, перакананая ўладальніца галоўнага тытула конкурсу прыгажосці сярод шматдзетных мам. Напачатку свята прыгажосці мацярынства са сцэны прагучаў прывітальны адрас старшыні Савета Рэспублікі Нацыянальнага сходу Рэспублікі Беларусь Наталлі Качанавай, а ў яго фінале на сцэну паднялася прэс-сакратар Прэзідэнта Наталля Эйсмант. Яна адзначыла: конкурс набірае маштаб і абароты, і выбраць пераможцу журы было вельмі няпроста.
— Хачу павіншаваць усіх вас і абсалютна ўпэўненая: тое, што здарылася сёння на гэтай сцэне, для кожнай з вас запомніцца на ўсё жыццё, — звярнулася Наталля Эйсмант да канкурсантак.
Пра тое, наколькі няпроста было выбраць пераможцу, таму што ўсе 23 фіналісткі вартыя гэтага тытула, сказаў са сцэны і міністр культуры Марат Маркаў: усе ўдзельніцы заслугоўваюць, каб імі захапляліся, падкрэсліў ён. Усе, хто падымаўся ў гэты вечар на сцэну, сыходзіліся ў меркаванні, што хоць конкурс і прадугледжвае адну каралеву прыгажосці, насамрэч «Красой Беларусі» можна назваць кожную фіналістку. І кожная з 23 шматдзетных мам-удзельніц конкурсу — ужо пераможца.
Аляксандра Анцэлевіч
Фота Валерыя Картуля
