Салют стане фінальным пунктам урачыстасцяў, завяршаючы маштабныя мерапрыемствы да Дня Незалежнасці. Запусцяць феерверкі ў парку Уга Чавеса, парку імя Паўлава, на набярэжнай у мікрараёне Дразды, парку Перамогі, пляцоўцы «Чыжоўка-Арэны», парку Купалы, пляцоўцы каля Нацыянальнай бібліятэкі.

Кацярына Лучына адзначыла, ужо распрацаваны план святочных мерапрыемстваў. «3 ліпеня з 12.00 пачне сваю работу асноўная гарадская пляцоўка — Палац спорту. У праграме выступяць папулярныя беларускія артысты, маладыя таленты, аркестры, уключаючы аркестр ГУУС Мінгарвыканкама і Нацыянальны акадэмічны канцэртны аркестр імя М. Я. Фінберга. Святочныя мерапрыемствы працягнуцца да 21.00», — расказала яна.

Пляцоўку арганізуюць на тэрыторыі Верхняга горада. Праграма тут будзе падзелена на дзве часткі — з 15.00 да 17.00 і з 19.00 да 21.00.

Таксама мерапрыемствы запланаваны ў кожным раёне горада. «У асноўным гэта паркавыя зоны. 3 ліпеня будзе працаваць каля 20 пляцовак, на якіх падрыхтавана насычаная канцэртная праграма, кірмашы, майстар-класы і спартыўныя актыўнасці», — удакладніла начальнік упраўлення культуры.

Вялікі святочны канцэрт пройдзе з 21.00 да 00.00 каля стэлы «Мінск — горад-герой». Традыцыйна адбудзецца і акцыя «Праспяваем гімн разам!»

З падрабязнай праграмай святочных мерапрыемстваў можна азнаёміцца на сайце Мінгарвыканкама.