Цырымонія ўзнагароджання была прымеркавана да Дня работнікаў культуры, які традыцыйна адзначаюць у другую нядзелю кастрычніка. З надыходзячым святам прадстаўнікоў культуры павіншаваў першы намеснік кіраўніка Адміністрацыі Прэзідэнта Уладзімір Пярцоў. Ён таксама зачытаў віншавальны адрас кіраўніка дзяржавы.

Як заўважыў міністр культуры Марат Маркаў, сёння сфера мае жаночы твар, хаця ў ёй вельмі шмат і выдатных мужчын. Але самае галоўнае — што ўсе, хто працуе ў ёй, адрозніваюцца любоўю да прафесіі, прысвячаюць ёй жыццё.

Сфера культуры актыўна развіваецца ў розных напрамках. «Цяпер вельмі модна стала паняцце крэатыўнай індустрыі, — адзначыў ён. — Свет ідзе па шляху развіцця, і яно накіравана ў тым ліку на тэатры, музеі, кінематограф. Думаю, што будуць таксама развівацца напрамкі маркетынгу і прадакшна».

Лепшым работнікам сферы былі ўручаны ўзнагароды ад розных міністэрстваў і ведамстваў, падораны кветкі і гучныя апладысменты.

Па словах генеральнага дырэктара Гомельскага палацава-паркавага ансамбля Ірыны Пырковай, заўсёды прыемна атрымліваць узнагароды, бо гэта значыць, што працу ўбачылі і ацанілі. «Я ўжо 22 гады працую ў сферы культуры, і хутка будзе 10 гадоў, як працую ў Гомельскім палацава-паркавым ансамблі. Кожны раз я дзякую Богу, што ён прывёў мяне менавіта ў гэту сферу, таму што такога каласальнага ўнутранага напаўнення, нягледзячы на ўсе складанасці, у іншых сферах няма. Я лічу, што культура — гэта нашы лёгкія, тое, чым можна дыхаць. Калі вам дрэнна ці складана, можна пайсці на выставу, канцэрт, спектакль, крыху напоўніцца і працягваць жыць далей», — заўважыла Ірына Пыркова.

Артыстка заслужанага калектыву Беларусі «Дзяржаўная акадэмічная харавая капэла ім. Г. Шырмы» Вольга Карпей працуе ў Беларускай дзяржаўнай філармоніі ўжо 30 гадоў, з першага курса кансерваторыі. Для яе падобныя ўзнагароды і ацэнка гледачоў таксама з’яўляюцца паказчыкам таго, што яе працу заўважылі, бо ацэньваць сябе самастойна заўсёды складана. Гэта дае матывацыю далей займацца музыкай, увесь час шукаць новыя шляхі для развіцця сваёй і музычнай, харавой культуры, даваць незвычайныя канцэрты.

Так, зараз Вольга Карпей разам з капэлай рыхтуецца да канцэрта «Новая прастора», які аб’яднае творчыя пошукі кампазітараў Расіі, Беларусі і замежжа. Праграма даследуе трансфармацыю харавога жанру ў новым тысячагоддзі. Акадэмічная традыцыя сустракаецца з авангарднымі тэхнікамі, мінімалізмам і элементамі неафальклору, ствараючы ўнікальнае гукавое поле — новую прастору сэнсаў і інтанацый.

«Чалавек культуры павінен несці гэту культуру знутры. Калі ён нясе сябе для людзей і аддае ў жыцці больш, чым бярэ, мне падаецца, гэта самае галоўнае. А ўжо мастацтва музычнае — гэта і ёсць вынік унутранай працы чалавечай душы», — падсумавала артыстка.