Пляцоўка Палаца культуры прафсаюзаў стала адпраўным пунктам для правядзення абласных тураў. Першыя адборачныя этапы пачнуцца ўжо 1 верасня і працягнуцца да 25 сакавіка 2026-га. Вынікі будуць падведзены ў пачатку мая наступнага года. Да ўдзелу дапускаюцца як індывідуальныя выканаўцы, так і творчыя калектывы.

За сваю шматгадовую гісторыю фестываль не страчвае сваёй папулярнасці. Для ўдзельнікаў гэта доўгачаканае мерапрыемства, да якога яны рыхтуюцца практычна ўвесь год. Сур’ёзна падыходзяць не толькі да выбару рэпертуару, але і прадумваюць да дробязяў свой сцэнічны вобраз. І ў большасці выпадкаў — гэта камандная праца, якая аб’ядноўвае ветэранаў.

— Сёлета мы праводзім ужо 18-ы рэспубліканскі фестываль народнай творчасці ветэранскіх калектываў. Дадзенае мерапрыемства яшчэ раз пацвярджае, наколькі актыўныя нашы ветэраны. Сёння тысячы ветэранаў з’яўляюцца актыўнымі членамі нашых першасных прафсаюзных арганізацый. І сёння практычна ўсе калектыўныя дагаворы арганізацый змяшчаюць нормы па падтрымцы былых работнікаў. Гэта сведчыць аб тым, што прафсаюзы памяталі, памятаюць і будуць памятаць, — адзначыла намеснік старшыні Федэрацыі прафсаюзаў Беларусі Таццяна Філімонава. — А дадзены фестываль спрыяе іх творчаму развіццю і актыўнаму даўгалеццю.

Неабходна адзначыць, што Федэрацыя прафсаюзаў традыцыйна выступае за пераемнасць пакаленняў, падтрымлівае традыцыі настаўніцтва і клопат аб ветэранах працы. Прафсаюзнымі арганізацыямі сумесна з сацыяльнымі партнёрамі арганізуюцца віншаванні і ўшаноўванні ветэранаў вайны і працы, працоўных дынастый, настаўнікаў моладзі, канцэрты, культурна-масавыя і аздараўленчыя мерапрыемствы, экскурсійныя праграмы, дыялогавыя пляцоўкі і іншыя мерапрыемствы.

Алена КРАВЕЦ