За першыя дзевяць месяцаў 2026 года ў Мінску засялілі больш за 400 арэндных і 150 сацыяльных кватэр. Пра гэта падчас аператыўнай нарады ў Мінгарвыканкаме паведаміў дырэктар прадпрыемства «Мінскія гарадскія інтэрнаты» Рыгор Казунка, паведамляе БелТА.
Па словах дырэктара, 97 жылых памяшканняў засялілі ў адпаведнасці з Указам Прэзідэнта, які дазваляе грамадзянам самастойна выканаць рамонт і не плаціць за карыстанне арэндным жыллём суму, суразмерную каштарыснаму кошту работ.
Рамонт выконваецца сіламі прадпрыемства. «Гэта дазваляе без правядзення працэдур закупак значна паскорыць засяленне», — падкрэсліў Рыгор Казунка.
На балансе прадпрыемства таксама знаходзяцца 42 інтэрнаты, у якіх пражываюць больш за 10 тыс. чалавек. «За дзевяць месяцаў гэтага года паступіла 1650 хадайніцтваў. Напрыклад, 234 — ад арганізацый ЖКГ, 132 — ад арганізацый адукацыі і 130 — аховы здароўя», — расказаў ён.
Распрацавана праграма капітальнага рамонту інтэрнатаў на найбліжэйшыя пяць гадоў. «У 27 інтэрнатах прадпрыемствам будуць выкананы работы па капітальным рамонце», — растлумачыў дырэктар.
