У сталічную міліцыю з заявай аб знікненні чалавека звярнулася жыхарка сталіцы. Паводле слоў жанчыны, яе 61-гадовая маці ўвечары не вярнулася дадому і перастала выходзіць на сувязь.

Аператыўнікі крымінальнага вышуку неадкладна пачалі праверку. У тэлефоне пенсіянеркі, які яна пакінула ў кватэры, былі знойдзены міжнародныя званкі і перапіскі з нейкімі людзьмі, якія прадстаўляліся жанчыне супрацоўнікамі Следчага камітэта і Нацыянальнага банка.

Далейшыя аператыўна-вышуковыя мерапрыемствы пацвердзілі, што мінчанка размаўляла з тэлефоннымі ашуканцамі.

Яны пераканалі жанчыну, што яна лічыцца саўдзельніцай злачынства і таму павінна безумоўна выконваць іхнія патрабаванні. Так пенсіянерка, сама таго не разумеючы, пагадзілася стаць кур’ерам зламыснікаў.

На таксі яна паехала ў Цэнтральны раён Мінска, дзе забрала ў незнаёмай жанчыны 15 тысяч долараў ЗША і 2 тысячы еўра. А затым купіла білет на цягнік і тым жа вечарам адвезла грошы ў суседнюю краіну, дзе аддала пакет з наяўнымі грашыма яшчэ аднаму пасярэдніку.

Вядома, што мінчанка працуе ў сферы пасажырскіх перавозак і неаднаразова бачыла ў метро прафілактычную рэкламу аб махлярстве, аднак да апошняга не разумела, што сама стала часткай злачыннай схемы. 

Распачата крымінальная справа.

Намеснік начальніка ўпраўлення крымінальнага вышуку ГУУС Мінска Андрэй Арлоўскі нагадвае: калі вас просяць аказаць дапамогу ахвярам ашуканцаў і забраць у іх наяўныя грошы, каб перадаць кур’еру або пакласці на замежны рахунак — то будзьце ўпэўнены, што гэта злачынцы. Спыніце з імі ўсякія кантакты і паведаміце аб такіх фактах у міліцыю.