Міністр па надзвычайных сітуацыях Вадзім Сіняўскі па традыцыі павіншаваў тых, хто стаяў ля вытокаў стварэння ратавальнага ведамства, і ўручыў ветэранам юбілейныя медалі за шматгадовы ўклад у нялёгкую прафесію.

— Вы сапраўдны залаты фонд Міністэрства па надзвычайных сітуацыях, нашага сучаснага ратавальнага ведамства, якое было створана Прэзідэнтам яшчэ ў 1994 годзе, — падкрэсліў міністр. — Вы сталі не толькі ўдзельнікамі гэтых гістарычных падзей, але і непасрэднымі рэалізатарамі ўсіх тых задач, якія былі вызначаны і пастаўлены. Сёння з пазіцыі тых гадоў мы добра разумеем, што гэтыя рашэнні далі магчымасць і на сучасным этапе паспяхова выконваць пастаўленыя задачы ў справе аказання дапамогі нашым грамадзянам, нашым людзям.

Вадзім Сіняўскі таксама адзначыў, што сістэма развіваецца і расце, і сённяшнія дасягненні ведамства сталі магчымы менавіта дзякуючы яго ветэранам — яны стваралі, рухалі, будавалі, развівалі і стваралі Міністэрства па надзвычайных сітуацыях нашай краіны. 

Беларуская грамадская арганізацыя ветэранаў органаў і падраздзяленняў па надзвычайных сітуацыях «Ратавальнік» аб’ядноўвае супрацоўнікаў МНС, якія аддалі службе больш за 25 гадоў. Па словах старшыні Рэспубліканскага савета РДГА «БДПТ» Аляксандра Кудрашова, ветэраны дапамагаюць выхоўваць маладых работнікаў ведамства, удзельнічаюць ва ўрачыстых, культурных і спартыўных мерапрыемствах. Створаная яшчэ ў 2002 годзе, сёння арганізацыя аб’ядноўвае больш за 4000 чалавек з 140 пярвічных арганізацый па ўсёй краіне.

Пасля заканчэння ўрачыстай часткі ўдзельнікі мерапрыемства наведалі філіял Інстытута перападрыхтоўкі і павышэння кваліфікацыі Універсітэта грамадзянскай абароны МНС. Таксама для ўдзельнікаў запланавана экскурсія на айчыннае прадпрыемства па вытворчасці пажарных машын, спецыяльнай і спецыялізаванай тэхнікі ТАА «Пажснаб».

Аміна НАЗАРАВА
Фота прэс-службы МНС Беларусі