Як паведаміў начальнік АПК Кастрычніцкага РУУС Мінска Сяргей Гурэцкі, на гарадскі тэлефон жыхара сталіцы патэлефанавалі нібыта супрацоўнікі «Белтэлекама» і пад маркай падаўжэння дагавора даведаліся пашпартныя даныя. А крыху пазней «прадстаўнік Нацбанка» пераканаў устанавіць дадатак і паднесці банкаўскую карту да тэлефона з функцыяй NFC, пасля чаго з рахунку спісалі каля 45 тысяч рублёў.

Пасля пацярпелага пераканалі аформіць крэдыты на 155 тысяч рублёў і перадаць грошы кур’еру, які прадставіўся інкасатарам.
Следчымі заведзена крымінальная справа па факце махлярства.

Міліцыя папярэджвае: ашуканцы выкарыстоўваюць новыя схемы з ужываннем тэхналогіі NFC, атрымліваючы доступ да карты і спісваючы ўсе грошы з рахунку.

Пры гэтым заўсёды трэба памятаць, што праваахоўнікі і работнікі банкаў ніколі не просяць грамадзян прыкладаць карту да смартфона, уводзіць PIN-код або ўстанаўліваць іншыя дадаткі. Калі невядомыя патрабуюць здзейсніць якія-небудзь маніпуляцыі з фінансамі — неадкладна спыніце размову і паведаміце пра гэта ў міліцыю!