Заяву для рэгістрацыі дамашняй жывёлы неабходна падаць у службу «Адно акно» мясцовага органа ўлады на працягу трох дзён з дня набыцця гадаванца (шчанюкі і кацяняты павінны быць зарэгістраваныя ва ўзросце ад 3 да 3,5 месяца). У Міністэрстве жыллёва-камунальнай гаспадаркі расказалі пра тое, якія дакументы трэба мець пры сабе ўладальніку чацвераногага гадаванца, паведаміла sb.by.
У ведамстве праінфармавалі:
— Ва ўсіх выпадках пры сабе неабходна мець пашпарт ці іншы дакумент, які сведчыць асобу ўладальніка жывёлы-кампаньёна. Калі гаворка ідзе аб рэгістрацыі сабакі, які патрабуе асаблівай адказнасці ўладальніка, небяспечнага сабакі, то трэба ўзяць з сабой копію пасведчання, што пацвярджае праходжанне спецыяльных курсаў, альбо копію пасведчання, што пацвярджае наяўнасць на момант рэгістрацыі абавязковай для ўладальніка сабакі кваліфікацыі спецыяліста службовай сабакагадоўлі. Акрамя таго, павінна прысутнічаць копія дакумента, які пацвярджае здзяйсненне здзелкі, прадметам якой з’яўляецца сабака, а таксама копія судовай пастановы або рашэння ўпаўнаважанага дзяржаўнага органа, якая пацвярджае, што сабака з’яўляецца небяспечным.
Калі рэгіструецца жывёла-кампаньён у кватэры шматкватэрнага або блакіраванага жылога дома, у аднакватэрным жылым доме, дзе пражываюць некалькі ўласнікаў (наймальнікаў), то неабходная пісьмовая згода ўсіх паўналетніх асоб, якія пражываюць у дадзеным жылым памяшканні.
У выпадку рэгістрацыі жывёлы-кампаньёна ў кватэры шматкватэрнага або блакіраванага жылога дома, аднакватэрным жылым доме, займаных па дагаворы найму, трэба пісьмовая згода наймадаўцы.
У МЖКГ нагадалі, што рэгістрацыя жывёлы-кампаньёна ажыццяўляецца ў адпаведнасці з пунктам 17.7 пераліку адміністрацыйных працэдур, якія ажыццяўляюцца дзяржаўнымі органамі і іншымі арганізацыямі па заявах грамадзян, зацверджанага Указам Прэзідэнта Беларусі ад 26 красавіка 2010 года № 200.
