Старшыня Праўлення Нацыянальнага банка Беларусі Раман Галоўчанка, віншуючы пераможцаў, адзначыў, што на працягу дзевяці гадоў гэты конкурс з’яўляецца візітнай карткай і адной з ключавых падзей Тыдня фінансавай граматнасці. Конкурс, паводле яго слоў, штогод адкрывае новыя імёны, таленты і дэманструе высокі ўзровень цікавасці і ўцягнутасці моладзі ў пытанні фінансавай асветы. 

«Тэма сёлетняга конкурсу вельмі актуальная і своечасовая — „Лічбавыя фінансы“, — падкрэсліў Раман Галоўчанка. — Яна выбрана невыпадкова, таму што адлюстроўвае ключавыя тэндэнцыі сённяшняга дня, тое, што адбываецца ў эканамічным свеце. Гэта імклівыя змены, у ходзе якіх лічбавыя тэхналогіі ўсё глыбей пранікаюць у жыццё кожнага з нас, у тым ліку ў сферу фінансаў. Фінансаў дзяржаўных, персанальных фінансаў. І становяцца ўжо не нейкай тэхналогіяй, на якую мы глядзім, яны становяцца неад’емным элементам нашага паўсядзённага жыцця. Вашы бацькі, старэйшыя члены сям’і вельмі шмат дзеянняў здзяйсняюць у лічбавым асяроддзі з дапамогай банкаўскага мабільнага дадатку, які ёсць у кожным смартфоне. Мы да гэтага прывыклі вельмі хутка, але яшчэ зусім нядаўна гэта было нечым такім, з разраду недаступнага».

За ўсім гэтым стаіць складаная і напружаная работа вялікай колькасці людзей, заўважыў старшыня Праўлення Нацыянальнага банка. У тым ліку супрацоўнікаў Нацбанка, якія будуюць лічбавую інфраструктуру і лічбавую фінансавую экасістэму. 

«Эфектыўнасць любых тэхналагічных рашэнняў ствараецца галоўным звяном — чалавекам, — заявіў Раман Галоўчанка. — Вы сёння здзейснілі вельмі важны крок у сваім жыцці — сталі ўдзельнікамі гэтага працэсу. Невыпадкова найлепшыя работы будуць выкарыстоўвацца ў тым ліку і ў адукацыйным працэсе, на ўроках, іншых мерапрыемствах, звязаных з фінансавай граматнасцю. Найлепшыя работы будуць размешчаны на адпаведным інтэрнэт-партале і актыўна задзейнічацца ў ходзе мерапрыемстваў, факультатыўных заняткаў ва ўстановах адукацыі па фінансавай граматнасці. Пакуль яны яшчэ факультатыўныя, але, я ўпэўнены, з часам стануць ужо абавязковым элементам адукацыі на ўсіх прыступках, таму што фінансы — гэта адна з тых матэрый, якія пранізваюць жыццё кожнага, і іх роля з кожным годам узрастае».

Задачай конкурсу было раскрыць тэму бяспечнага, адказнага і рацыянальнага выкарыстання сучасных фінансавых інструментаў. На конкурс паступіла больш за 500 работ з усіх куткоў нашай краіны. «Найбольш важным дасягненнем, якое можна адзначыць і якое характэрна для ўсіх канкурсантаў, — здольнасць выкладаць складаныя пытанні ў даступнай, змястоўнай і нагляднай форме. Большасці гэта, вядома ж, удалося. У той жа час у работах былі раскрыты і механізмы функцыянавання лічбавых фінансаў, прааналізаваны магчымасці выкарыстання тэхналогій штучнага інтэлекту і прапанаваны вельмі важныя падыходы да абароны ад кібермахлярства, што цяпер, безумоўна, з’яўляецца выклікам для ўсіх у нашым свеце», — дадаў Раман Галоўчанка, звяртаючыся да дзяцей.

У Нацбанку ўшанавалі, паводле яго слоў, не проста пераможцаў конкурсу, але і адзначылі тых прадстаўнікоў моладзі, хто ўносіць такім чынам свой уклад у будучыню нашай краіны, фарміруючы фінансавую культуру новага пакалення.

Яна ВАЛАСАЧ
Будзе дапоўнена
Фота аўтара