8 верасня ля будынка парламента ў Катманду прайшла дэманстрацыя, у якой узялі ўдзел тысячы людзей. Пратэстуючыя выступілі супраць абвешчанага рашэння ўрада забараніць работу шэрагу сацсетак і мэсэнджараў у краіне, а таксама супраць карупцыі. Удзельнікі мітынгу прарвалі загароды і праніклі ў будынак парламента. Адбыліся сутыкненні дэманстрантаў з паліцэйскімі. 

Паводле звестак India Today, прадстаўнікі сіл правапарадку ўжылі вадамёты, слёзатачывы газ, а таксама адкрылі агонь. Улады ўвялі каменданцкі час у раёне размяшчэння парламента і ў іншых ключавых месцах сталіцы. Пратэсты супраць забароны сацсетак, акрамя Катманду, прайшлі яшчэ ў некалькіх буйных гарадах Непала, што вымусіла ўлады ўмяшацца і прыняць меры па падтрыманні парадку.

4 верасня ўрад Непала ўвёў забарону на WhatsApp, а таксама Facebook і Instagram і іншыя буйныя сацыяльныя сеткі, якія не былі зарэгістраваныя ў міністэрстве сувязі і інфармацыйных тэхналогій краіны ва ўстаноўлены тэрмін. Гэтае рашэнне было прынята ў адпаведнасці з дырэктывай Вярхоўнага суда, якая прадпісвае ўраду забяспечыць афіцыйную рэгістрацыю ўсіх анлайн-платформаў і сацыяльных сетак — як айчынных, так і замежных — да пачатку работы ў Непале, каб забяспечыць магчымасць маніторынгу непажаданага кантэнту. Доступ да платформаў быў заблакіраваны пасля таго, як ні адна з іх не падала заяўку на рэгістрацыю.