На Паўднёвым востраве Новай Зеландыі ў выніку масавага выкіду на бераг загінулі шэсць кітоў. Валанцёры спрабуюць вярнуць у мора яшчэ 15 жывых асобін, паведамляе BBC.
8 студзеня на бераг мыса Фэруэл выкінула каля 55 кітоў-пілотаў. Большасці ўдалося вярнуцца ў мора, але 15 з іх аказаліся на мелі.
У апублікаваным відэароліку ад некамерцыйнай арганізацыі Project Jonah, якая займаецца абаронай марскіх млекакормячых, паказана, як валанцёры паліваюць кітоў вадой з вёдраў, каб астудзіць іх. «Калі прыліў пачнецца, нам прыйдзецца дзейнічаць вельмі хутка, каб сабраць гэтых кітоў разам, а затым перамясціць іх у больш глыбокія воды», — расказала адна з валанцёраў.
Новазеландскае прыродаахоўнае ведамства накіравала рэйнджараў, лодку і беспілотнік на мыс Фэруэл для маніторынгу магчымых новых выпадкаў выкіду жывёл на бераг.
У раёне мыса Фэруэл рэгулярна адбываюцца масавыя выкіды марскіх жывёл на бераг. Дэпартамент аховы прыроды апісвае гэта месца як натуральную «пастку для кітоў», размешчаную ўздоўж міграцыйнага маршруту доўгаплаўніковых кітоў.
У лютым 2017 года ў Новай Зеландыі на бераг мыса Фэруэл выкінула больш за 400 кітоў-пілотаў, што стала найбуйнейшым выпадкам масавага выкіду ў гісторыі краіны.
Кіты-пілоты — буйныя прадстаўнікі сямейства дэльфінавых, вядомыя сваёй масіўнай шарападобнай галавой і цёмнай афарбоўкай. Яны жывуць у акіяне і палююць на малюскаў.
