Віцебская абласная бібліятэка імя У. І. Леніна прадаўжае творчы праект «Краязнаўчыя сустрэчы». Чарговая сустрэча чытачоў, наведвальнікаў бібліятэкі, усіх, хто імкнецца адкрыць віцебскія таямніцы, была прысвечана знаёмству з кнігай вядомага ў краіне і за яе межамі краязнаўчага пісьменніка Аркадзя Падліпскага «Працяг сапраўдных вандровак па старому Віцебску».
Болей 200 цікавых будынкаў і аб’ектаў і іх насельнікі ў першыя дзесяцігоддзі XX стагоддзя — на старонках унікальнага выдання. Кніга з’яўляецца працягам выдадзенага раней краязнаўчага зборніка — «Сапраўдныя вандроўкі са старой картай».
Расказвае загадчык аддзела краязнаўства абласной бібліятэкі Ларыса Рагачова:
—Ужо сам Аркадзь Міхайлавіч Падліпскі з’яўляецца легендай нашага горада. Аўтар дзесяткаў кніг, альбомаў, брашур, сотняў артыкулаў, ён стварыў партрэт забытага, невядомага Віцебска і яго блізкіх ваколіц. Дзякуючы нястомнай, шматабсяжнай даследчыцкай працы ўнікальнага збіральніка гістарычнай памяці мы маем магчымасць зазіраць у падзеі, якія даўно мінуліся, адкрываць лёсы людзей, якія паказалі прыклад, як пражыць адведзены ім час стваральна, прыгожа. Новая праца краязнаўца — «Працяг сапраўдных вандровак па старому Віцебску», пра якую ішла размова на прэзентацыі, стане ўпрыгожваннем нашага бібліятэчнага фонда. Упэўнена, дакладна ведаю, што яе не аднойчы здымуць з бібліятэчнай паліцы зацікаўленыя чытачы. У чытачоў розных пакаленняў існуе вялікае жаданне адкрываць свой горад, знаёміцца са сваімі папярэднікамі, якія хадзілі знаёмымі і нам вуліцамі..
Мікола Берлеж
