Па ініцыятыве дэпутатаў 3 сакавіка ў Авальнай зале Дома ўрада сустрэнуцца прадстаўніцы ўсіх 118 раёнаў Беларусі, якія сваёй працай уносяць важкі ўклад у развіццё беларускай вёскі. З трыбуны лепшыя з лепшых раскажуць аб тым, што значыць сёння быць сельскай жанчынай у Беларусі.

«Каб падкрэсліць усебаковае прызнанне ўкладу жанчын у развіццё краіны, на святочнае мерапрыемства ў Авальную залу запрошаны прадстаўніцы розных прафесій: настаўнікі, урачы, работніцы АПК і многія іншыя. Іх усіх аб’ядноўвае адно — яны нацэлены на тое, каб будучыня сельскай мясцовасці ў нашай краіне з кожным днём станавілася ўсё больш прывабнай», — адзначылі ў прэс-службе.

Удзельніцы форуму падзеляцца гісторыямі свайго поспеху і бачаннем шляхоў развіцця сельскіх тэрыторый у кантэксце рэалізацыі Праграмы сацыяльна-эканамічнага развіцця Рэспублікі Беларусь на 2026-2030 гады.

Форум адбудзецца ў адпаведнасці з рэспубліканскім планам мерапрыемстваў па правядзенні сёлета Года беларускай жанчыны. Мерапрыемства арганізуюць Палата прадстаўнікоў пры падтрымцы аблвыканкамаў і Міністэрства культуры.

У фае Авальнай залы будзе арганізавана выстава «Пяшчота зямлі беларускай у жаночых далонях». Экспазіцыя прызначана падкрэсліць ролю жанчын, якія жывуць у сельскай мясцовасці, якія сваім прыкладам садзейнічаюць развіццю вёскі.