Да трэцяй сесіі ў Палату прадстаўнікоў унесена 24 пытанні і практычна ўсе яны ўжо адпрацаваны, адзначыў Вадзім Іпатаў. «14 праектаў рыхтуецца да разгляду ў першым чытанні, тры праекты ў другім і сем праектаў таксама рыхтуецца да разгляду ў першым чытанні, але яны звязаны перш за ўсё з міжнародным супрацоўніцтвам. Пытанні самыя розныя — ад крымінальнай адказнасці і заканчваючы водакарыстаннем. Інакш кажучы, тыя пытанні, якія непасрэдна звязаны з жыццём людзей», — сказаў ён.

Самая галоўная задача дэпутатаў — якасная падрыхтоўка законапраектаў, як таго патрабуе Прэзідэнт, каб яны ішлі ад жыцця. «Тут мы выкарыстоўваем самыя розныя метады работы, пачынаючы ад арганізацыі вывучэння пытанняў дэпутатамі Палаты прадстаўнікоў на арганізаваных семінарскіх сустрэчах, круглых сталах і заканчваючы пашыранымі пасяджэннямі пастаянных камісій. Яшчэ адзін важны элемент: мы аднавілі практыку, якая існавала раней, — прадстаўленне Міністэрствам замежных спраў інфармацыі аб найбольш значных, важных праектах законаў, якія былі прыняты ў розных дзяржавах. Гэта найперш накіравана на тое, каб, калі мы адпрацоўваем падобныя пытанні, забяспечыць належны ўзровень прагнозу наступстваў прыняцця праекта, а таксама, вядома, вывучэнне найбольш эфектыўных пытанняў прававога рэгулявання, — звярнуў увагу Вадзім Іпатаў. — Многія дзяржавы ставяць перад сабой задачу павышаць эфектыўнасць прымаемых законаў, і ў нас якраз такая ж задача. Таму гэта дадатковая крыніца інфармацыі, якая дазваляе дэпутатам прымаць найбольш правільныя рашэнні».

• Старшыня Пастаяннай камісіі па дзяржаўным будаўніцтве, мясцовым самакіраванні і рэгламенце Палаты прадстаўнікоў Валянцін Семяняка нагадаў, што ў беларускім заканадаўстве няма такога паняцця, як «парламенцкія канікулы». «Палата прадстаўнікоў працуе няспынна. У міжсесіённы перыяд дзейнасць дэпутатаў па падрыхтоўцы законапраектаў асабліва актывізуецца. Гэта дало магчымасць нам да пачатку сесіі падысці са значным партфелем законапраектаў — узгодненых, дапрацаваных і гатовых да разгляду ў Авальнай зале. Усяго будзе разгледжана 19 законапраектаў. Сярод іх я вылучыў бы Водны, Падатковы кодэксы, КоАП. Таксама ёсць законапраекты, якія датычацца ваеннай бяспекі, абароны, дзейнасці органаў і падраздзяленняў па надзвычайных сітуацыях. Асобным блокам стаяць законапраекты, якія датычацца непасрэдна забеспячэння жыццядзейнасці нашых грамадзян. Гэта, напрыклад, законы па пытаннях пітнога водазабеспячэння, дарожнай дзейнасці, энергазберажэння. Усе гэтыя законапраекты будуць разгледжаны ў першым чытанні», — падкрэсліў ён.

Для разгляду ў другім чытанні падрыхтаваны законапраекты, што датычацца пытанняў прадастаўлення пазык, а таксама адміністрацыйнай і крымінальнай адказнасці. Асобным значным блокам, што складае прыкладна трэць усіх пытанняў, якія будуць разглядаць дэпутаты, стаяць законапраекты, якія датычацца сертыфікацыі міжнародных дагавораў і пагадненняў, расказаў Валянцін Семяняка. «Тут неабходна вылучыць два законапраекты, якія датычацца ўзаемаадносін з Расійскай Федэрацыяй. У прыватнасці, будзе ратыфікавана пагадненне аб прадастаўленні аднолькавых выбарчых правоў грамадзянам Рэспублікі Беларусь і Расійскай Федэрацыі. Гэта практыка працуе ўжо, яе проста трэба канчаткова дапрацаваць юрыдычна. Таксама будзе разгледжаны і прыняты законапраект, ратыфікуючы пагадненне аб абароне грамадзян Саюзнай дзяржавы ад незаконнага праследавання замежнымі дзяржавамі і міжнароднымі арганізацыямі. У гэтым жа блоку міжнароднага супрацоўніцтва — шэраг пагадненняў з дзяржавамі далёкай дугі па прадастаўленні асобным катэгорыям грамадзян бязвізавага рэжыму. Яны будуць датычыцца як грамадзян Рэспублікі Беларусь, так і грамадзян гэтых дзяржаў», — звярнуў увагу старшыня Пастаяннай камісіі.

Разам з тым чакаецца ўнясенне ноых законапраектаў. «Пералік, які мы зацвердзім і які стане асноўным дакументам для нашай першачарговай дзейнасці, не канчатковы. Па меры падрыхтоўкі законапраектаў, па меры іх паступлення ў Палату прадстаўнікоў і гатоўнасці парадак дня сесіі будзе дапаўняцца. Думаю, ён будзе насычаны і самае галоўнае, што той план заканатворчай дзейнасці, які ў нас ёсць на гэты год, будзе выкананы і нават перавыкананы з улікам рэальных абставін жыцця, з якімі мы сутыкаемся кожны дзень», — заўважыў ён.

На пасяджэнні парламентарыі разгледзяць пытанні, звязаныя з пачаткам работы трэцяй сесіі Палаты прадстаўнікоў Нацыянальнага сходу Рэспублікі Беларусь восьмага склікання. Акрамя таго, члены Савета абмяркуюць пытанні вывучэння міжнароднага вопыту заканадаўчага рэгулявання розных сфер грамадскіх адносін і аб прапановах у рабоце Парламенцкага сходу Саюза Беларусі і Расіі.