Прэм’еру праграмы «У панядзелак дойдзе да Лукашэнкі» рыхтуюць на Першым інфармацыйным, гэта новы праект, які не мае аналагаў на беларускім тэлебачанні. Героямі стануць звычайныя людзі — аўтары тых ролікаў, якія ўзрываюць сацыяльныя сеткі. Як прагучала ў эфіры, новы праект — гэта рэвізія сацыяльных сетак, скарг, праблем, крыўд, рабочых гісторый, якія набралі мільёны праглядаў.

«Мы хочам кожную сітуацыю разабраць і паказаць тое, што ўнутры. Тое, чаго мы не хочам (і гэта таксама вельмі важны момант), — мы, паверце, ні ў якім разе не хочам нікога прымусіць замаўчаць. Прэзідэнт усім сказаў: „Пішыце“. Мы можам паўтарыць: пішыце, але пішыце праўду. Кіраўнік на любым, нават дробным узроўні, разумее: калі ён пакрыўдзіць чалавека або зробіць нешта не так, гэты чалавек можа дастукацца нават да Прэзідэнта, апублічыўшы гэту гісторыю. І гэта сапраўды дадатковы механізм, які многіх можа трымаць у тонусе. Але чарговы раз паўтару — калі ласка, пішыце Прэзідэнту праўду», — сказала прэс-сакратар Прэзідэнта Беларусі Наталля Эйсмант.

Паводле слоў аўтараў праекта, гэта будзе дакументальнае расследаванне, іх задача — дакапацца да ісціны, расказаць аб праблеме, паколькі не заўсёды ўсё адназначна. Падкрэсліваецца, што ў час работы над праектам аўтары вывучаюць дакументы, запісваюць інтэрв’ю з героем серыі, у тым ліку з другім бокам, наведваюць нават судовыя пасяджэнні.

Прэм’ера адбудзецца 18 мая на «Беларусь 1» адразу пасля «Панарамы».