Паводле «Плана дзеянняў па ператварэнні Пекіна ў новую вышыню ў галіне штучнага інтэлекту» сталічныя ўлады будуць імкнуцца ў бліжэйшыя 2 гады павялічыць аб’ём ШІ-галіны да звыш 1 трлн юаняў, і тым самым замацаваць сваю ролю ў якасці глабальнага інавацыйнага цэнтра ў галіне, перадае «Сіньхуа».
Улады плануюць рэалізаваць 9 буйных ініцыятыў, накіраваных на розныя сектары індустрыі штучнага інтэлекту, з упорам на тэхналагічныя інавацыі. Прыярытэтная ўвага — тэхналагічным прарывам, дзякуючы скаардынаваным даследчым намаганням, павышэнню якасці даных і пашырэнню сферы прымянення ў розных сектарах. План таксама ўключае меры па прыцягненні таленавітых спецыялістаў, мабілізацыі доўгатэрміновага капіталу і падтрымцы экасістэм з адкрытым зыходным кодам.
Ян Сюлін, кіраўнік Пекінскага муніцыпальнага камітэта па справах развіцця і рэформаў, заявіла, што іншыя мэты ўключаюць у сябе стварэнне вылічальнага кластара штучнага інтэлекту магутнасцю больш за 100 тыс. чыпаў, з’яўленне ў галіне больш за 10 новых кампаній і больш за 20 фірмаў-аднарогаў.
Гэтыя меры закліканы паскорыць ператварэнне сталіцы Кітая ў новую глабальную вышыню ў галіне інавацый у сферы штучнага інтэлекту. На працягу 14-й пяцігадовай праграмы народнагаспадарчага і сацыяльнага развіцця (2021—2025 гг.) Кітай паставіў інавацыі сярод прыярытэтаў мадэрнізацыі, стварыўшы адну з самых перадавых экасістэм у галіне штучнага інтэлекту ў свеце і пашырыўшы магчымасці розных сектараў — ад вытворчасці і аховы здароўя да транспарту і фінансаў.
Па даных Кітайскай акадэміі інфармацыйных і камунікацыйных тэхналогій (CAICT), у ШІ-сектары краіны назіраецца ўстойлівы рост. Па стане на верасень мінулага года ў галіне налічвалася больш за 5300 прадпрыемстваў, што складае 15 працэнтаў ад агульнасусветнай колькасці.
