«Больш за 50 % пашпартоў па краіне падпісаны і перададзены на падпісанне. Дастаткова актыўна працуюць раённыя камісіі, аб’язджаюць установы адукацыі, глядзяць завяршэнне ўсіх работ пры падрыхтоўцы да новага навучальнага года. Дзейнасць ажыццяўляецца ў планавым рэжыме», — сказаў Аляксандр Кадлубай на палях адзінага метадычнага рэспубліканскага семінара-нарады «Перспектывы развіцця дашкольнай, агульнай сярэдняй і спецыяльнай адукацыі ў 2025/2026 навучальным годзе», арганізаванага Мінадукацыі ў Мінску.

Намеснік міністра адзначыў, што парадак падпісання пашпартоў гатоўнасці вызначае пастанова Савета Міністраў № 141. Абследаванне праводзіцца ў вясновы перыяд, недахопы фіксуюцца адпаведнымі службамі. Кіраўнік установы адукацыі загадзя прагназуе ліквідацыю тых ці іншых недахопаў. І калі яны крытычныя, раённае, абласное кіраўніцтва можа прыняць рашэнне аб пераводзе дзяцей у іншую ўстанову адукацыі, пастаноўцы на капітальны рамонт або рэканструкцыю, рэстаўрацыю таго ці іншага аб’екта. 

У тых выпадках, калі ва ўстанове адукацыі рамонтныя работы будуць працягвацца пасля 20 жніўня (да гэтай даты павінны быць падпісаны пашпарты гатоўнасці) альбо шэраг работ на асобных карпусах устаноў будзе весціся пасля 1 верасня, рэгіянальныя органы прадугледжваюць кампенсавальныя мерапрыемствы, якія забяспечваюць бяспечную і поўную рэалізацыю вучэбнага працэсу для навучэнцаў канкрэтнай установы адукацыі. 

«Таму можам казаць аб планавай, прагназаванай, спакойнай рабоце па падпісанні пашпартоў гатоўнасці», — падкрэсліў Аляксандр Кадлубай.

Гаворачы аб крытэрыях, якія павінны вытрымлівацца для падпісання пашпартоў гатоўнасці, ён адзначыў, што ўстановам адукацыі неабходна адпавядаць патрабаванням бяспекі па ўсіх параметрах — ад агароджы да пажарнай сігналізацыі. Школы павінны быць забяспечаны кадрамі, неабходным для адукацыйнага працэсу абсталяваннем. Без гэтага ўстанова адукацыі не можа працаваць.

Першая частка адзінага метадычнага рэспубліканскага семінара-нарады была прысвечана абмеркаванню трох пытанняў: асноўным тэндэнцыям развіцця агульнай сярэдняй адукацыі ў 2025/2026 навучальным годзе, самакантролю за забеспячэннем якасці адукацыі ва ўстанове агульнай сярэдняй адукацыі, а таксама вывучэнню якасці агульнай сярэдняй адукацыі ў 2024/2025 навучальным годзе.

Запланавана таксама знаёмства з вопытам работы ўстаноў агульнай сярэдняй адукацыі Мінска, пасля чаго адбудзецца абмеркаванне асноўных аспектаў функцыянавання ўстаноў дашкольнай, агульнай сярэдняй і спецыяльнай адукацыі ў 2025/2026 навучальным годзе і іншых пытанняў.