Паэтэсу, краязнаўца, мастака, педагога са стажам ў некалькі дзесяцігоддзяў Галіну ЗАГУРСКУЮ добра ведаюць у Полацку, на Віцебшчыне. Аўтар некалькіх кніг паэзій, многіх публікацый у рэспубліканскім і мясцовым друку, яна доўгі час кіравала працай славутага літаратурнага аб’яднання «Наддзвінне». Гісторыя гэтага творчага калектыва звязана з імёнамі народнага паэта Беларусі Петруся Броўкі, вядомых пісьменнікаў Тараса Хадкевіча, Алеся Савіцкага, іншых паэтаў і празаікаў.
Днямі ў Полацкім раённым Цэнтры рамёстваў і нацыянальных культур прайшла прэзентацыя новай кнігі Галіны Загурскай «Жывуць у Полацку стагоддзі..» Аўтар чытала свае вершы, адказвала на пытанні моладзі, а таксама — удзельнікаў літаб’яднання «Наддзвінне», якія прыйшлі павіншаваць калегу па літаратурным цэху з новым творчым здзяйсненнем.
Пад адной вокладкай у паэтычным зборніку сабраны дзесяткі вершаў і паэм (у прыватнасці, у кнігу увайшла і адметная паэма «Усяслаў Чарадзей»), якія прысвечаны гістарычным постацям славутых ураджэнцаў Полацка і Полаччыны.
