Зарэгістравана амаль 29 млн выбаршчыкаў, адкрыта 32 тыс. участкаў для галасавання. За мяжой змогуць прагаласаваць больш як 500 тыс. палякаў на 511 участках. У ЗША ў сувязі з розніцай у часе галасаванне пачалося яшчэ ў суботу, 17 мая. Галасаванне Польшчы працягнецца сёння да 21:00 (22:00 па Мінску), адразу пасля закрыцця выбарчых участкаў вядучыя тэлеканалы прадставяць вынікі экзітполаў, падрыхтаваных сацыялагічнай службай Ipsos.

На пасаду кіраўніка дзяржавы прэтэндуюць 13 чалавек — гэта паўтарэнне рэкорду, устаноўленага на прэзідэнцкіх выбарах у 1995 годзе. Сярод іх шэсць кандыдатаў зарэгістраваны як беспартыйныя, астатнія сем прадстаўляюць розныя партыі і аб’яднанні. Гэты падзел з’яўляецца ўмоўным, паколькі «незалежнага кандыдата» Кароля Наўроцкага афіцыйна падтрымлівае галоўная апазіцыйная партыя «Права і справядлівасць» (ПіС), а зарэгістраваная як беспартыйная Магдалена Беят стала кандыдатам ад кааліцыі «Левыя».

Паводле апытанняў, ніводны з удзельнікаў прэзідэнцкай гонкі не карыстаецца дастатковай падтрымкай, каб перамагчы ў першым туры. Найбольшыя шанцы на праходжанне ў другі тур маюць кандыдат ад кіруючай «Грамадзянскай кааліцыі» Дональда Туска мэр Варшавы Рафал Тшаскоўскі і дырэктар польскага Інстытута нацыянальнай памяці Кароль Наўроцкі, падтрыманы ПіС. На трэцім месцы кандыдат ад ультраправага аб’яднання «Канфедэрацыя» Славамір Ментцэн.

Фота: AP Photo