Аб'екты, якія не выкарыстоўваюцца, — у справу 

Трэба сказаць, што сама грыбная вытворчасць з’явілася ў Шчучыне ў 2018 годзе. Да гэтага прыватны інвестар ужо ўклаўся ў альтэрнатыўную энергетыку, пабудаваўшы ў 2015-м на тэрыторыі былога ваеннага аэрадрома сонечную электрастанцыю магутнасцю 2,5 МВт, уцягваючы тым самым аб'екты ваеннага гарадка, якія не выкарыстоўваюцца, у гаспадарчы абарот. Дарэчы, уся энергія, якая выпрацоўваецца, зараз выкарыстоўваецца для патрэб дзвюх фабрык па вытворчасці шампіньёнаў (другая фабрыка з’явілася праз год пасля адкрыцця першай). 

Па словах дырэктара таварыства з абмежаванай адказнасцю «Логал-бія» Аляксандра Алейнікава, магутнасці прадпрыемства дазваляюць на поўнай загрузцы вырошчваць да 5 тысяч тон свежых шампіньёнаў у год. Сёння на прадпрыемстве 24 камеры вырошчвання. Агульная пасяўная плошча — больш за 17 тысяч квадратных метраў. Пры поўнай загружанасці прадпрыемства вырабляе каля 5 тысяч тон шампіньёнаў у год, рэалізуючы іх не толькі на ўнутраным рынку, але і ў Расіі, Казахстане.

Неабходнасць ва ўласнай вытворчасці субстрату для вырошчвання грыбоў паўстала, як гаворыцца, ад жыцця — у прадпрыемства з’явіліся аб’ектыўныя складанасці з увозам імпартнай сыравіны. Так, тут адважыліся на ўдзел у праграме «Адзін раён — адзін праект». І гэта стала добрым прыкладам, калі прыватная ініцыятыва ўвайшла ў спалучэнне з дзяржаўнай палітыкай. У дапамогу ініцыятыўным інвестарам быў выдзелены крэдыт са сродкаў Банка развіцця пад камфортную васьміпрацэнтную стаўку. Часткова прыцягваліся сродкі інавацыйнага фонду Гродзенскага аблвыканкама і ўласныя сродкі інвестараў. Арыенціровачны кошт праекта складае 74,6 мільёна рублёў. 

І вось на месцы пляцоўкі, якая яшчэ нядаўна была парослай лесам, ужо ўзвышаюцца карпусы будучай вытворчасці. Мяркуецца, што атрыманы субстрат будзе выкарыстоўвацца як ва ўласнай вытворчасці, так і рэалізоўвацца іншым айчынным вытворцам грыбной прадукцыі. 

Дарэчы, тут будзе створана каля 30 новых працоўных месцаў. Можа камусьці падасца гэта недастаткова для комплексу, але паколькі вытворчасць аўтаматызаваная, такая колькасць персаналу здольна цалкам забяспечыць увесь вытворчы працэс. 

Хто працуе, той і зарабляе

У цяперашні час на прадпрыемстве працуюць каля 200 работнікаў. Сярод іх ёсць працоўныя мігранты. Як растлумачыў Аляксандр Алейнікаў, у асноўным у вытворчых працэсах задзейнічаны выхадцы з Таджыкістана. Прыцягнутых спецыялістаў каля 20-ці, працуюць сумленна і якасна, прызнае дырэктар. Чаму прыйшлося звярнуцца да іх рэсурсу? Усё тлумачыцца блізкасцю райцэнтра да Гродна, да якога крыху больш за 50 км, — шмат спецыялістаў з раёна знайшлі сабе працу ў абласным цэнтры, дзе, зразумела, узровень жыцця вышэйшы. 

Адпраўляемся ў адну з вытворчых камер па вырошчванні грыбоў (усяго іх 24: па 12 у кожным з двух карпусоў). Унутры падтрымліваецца спецыяльны мікраклімат, які спрыяе росту грыбоў. Роўныя ярусы стэлажоў усеяныя белымі шапачкамі шампіньёнаў розных памераў. Растуць грыбы да збору 15 дзён — такі вытворчы цыкл. Збор праводзіцца ўручную, падчас яго шампіньёны сартуюцца па памеры. 

Тут працуе Мехрытдзін Рахманаў з Таджыкістана. Разам з ім на заробкі ў Беларусь прыехала яго жонка Назіра і сястра Сабіна. Жанчыны таксама занятыя ў зборы гатовай прадукцыі. Па словах мужчыны, умовамі працы задаволеныя ўсе члены яго сям’і — працуюць у цяпле, зарплату атрымліваюць своечасова, жывуць ва ўтульным інтэрнаце, які адносіцца да камунальнай уласнасці раёна. Яму разам з жонкай для большай зручнасці выдзелілі пакой для пражывання. Ды і стаўленне да мігрантаў добразычлівае, кажа Мехрытдзін. На пытанне, хто застаўся ў іх на радзіме, адказвае, што чакаюць дзеці, хай і не зусім малыя, але ўсё роўна па бацьках сумуюць. 

Што датычыцца ўзроўню аплаты працы, мой суразмоўца сціпла заўважыў, што на ўсё хапае: і сабе на жыццё, і на радзіму грошы адправіць. 

Варта дадаць, што даход залежыць ад выпрацоўкі: найлепшыя зборшчыцы, па словах кіраўніка, на рукі атрымліваюць да 3 200 рублёў. 

Замест пасляслоўя

У ліку прадпрыемстваў, якія фарміруюць дабрабыт раёна, акрамя ТАА «Логал-Бія» на Шчучыншчыне яшчэ некалькі. Самыя буйныя — ААТ «Шчучынскі завод «Аўтаправод», ТАА «Праймілк», Шчучынскі філіял ААТ «Малочны мір». Усе яны стабільна развіваюцца і ўносяць свой уклад у будучыню раёна.

Вольга АЛЯКСАНДРАВА, фота аўтара.