Тут адбылася сустрэча з Надзвычайным і Паўнамоцным Паслом КНР у Беларусі Чжанам Вэньчуанем, у ходзе якой бакі абмеркавалі перспектывы развіцця далейшага двухбаковага супрацоўніцтва. 

На пачатку сустрэчы старшыня Пастаяннай камісіі Савета Рэспублікі па міжнародных справах і нацыянальнай бяспецы Сяргей Алейнік згадаў паездку кіраўніка кітайскай дыпмісіі ў Гродзенскую вобласць на мінулым тыдні, адной з актуальных тэм якой стала абмеркаванне падрыхтоўкі да першага Беларуска-Кітайскага форуму рэгіёнаў, правядзенне якога намечана на чэрвень 2026 года ў горадзе Ланьчжоў (правінцыя Ганьсу). «Наша міжрэгіянальнае супрацоўніцтва мае вялікі патэнцыял для далейшага пашырэння і паглыблення нашых узаемаадносін, адкрывае магчымасці ў эканоміцы, інвестыцыях, сацыяльна-гуманітарнай сферы, у развіцці культуры, аховы здароўя, адукацыі і турызму», — адзначыў сенатар. 

У сваю чаргу Надзвычайны і Паўнамоцны Пасол КНР у Беларусі Чжан Вэньчуань падкрэсліў: «Кітайскі бок заўсёды разглядае нашы адносіны з пункту гледжання доўгатэрміновай перспектывы ўзаемадзеяння. Мы гатовы супрацоўнічаць з нашымі беларускімі сябрамі ва ўсіх абласцях на карысць нашых народаў». 

Кітайскі бок, паводле слоў дыпламата, надае вялікую ўвагу супрацоўніцтву з Беларуссю і па парламенцкай лініі. «Упэўнены, што пры агульных намаганнях першы Беларуска-кітайскі форум абавязкова ўвянчаецца поспехам, а таксама ўнясе свой уклад у развіццё ўсепагоднага і ўсебаковага партнёрства паміж нашымі краінамі».

У размове з журналістамі Сяргей Алейнік расказаў аб ключавых аспектах, якія абмяркоўваліся ў ходзе рабочай сустрэчы з паслом КНР. «Два гады таму на ўзроўні заканадаўчых органаў нашых краін мы стварылі Камітэт высокага ўзроўню. Ужо правялі два пасяджэнні. Першае прайшло ў Пекіне, летась — у Мінску. Сёння мы абмяркоўвалі перспектывы далейшага развіцця работы гэтага камітэта і разлічваем на кантакты паміж кіраўніцтвам заканадаўчых органаў улады сёлета», — паведаміў ён.

У ходзе сустрэчы таксама была ўдзелена асаблівая ўвага міжрэгіянальнаму супрацоўніцтву. «Даволі даўно абмяркоўваецца пытанне аб вывядзенні нашага міжрэгіянальнага супрацоўніцтва ў фармат форуму рэгіёнаў. У нас кожная вобласць мае па 3-4 партнёрскія пагадненні з правінцыямі Кітая. Падпісана больш за 100 пагадненняў, якія накіраваны на паглыбленне гандлёва-эканамічных, сацыяльна-гуманітарных сувязяў паміж рэгіёнамі нашых краін, — пералічыў Сяргей Алейнік. — І, вядома, мы абмеркавалі перспектывы правядзення форуму рэгіёнаў, які быў папярэдне абвешчаны на мінулым тыдні і, як чакаецца, будзе праходзіць паміж Гродзенскай вобласцю і правінцыяй Ганьсу. Безумоўна, да гэтага форуму падключацца і іншыя рэгіёны. Мы разглядаем гэта як першы крок у развіцці больш сістэмнага міжрэгіянальнага супрацоўніцтва паміж нашымі краінамі». 

Акрамя таго, была ўдзелена ўвага тэме маладзёжнага супрацоўніцтва. «На парадку дня стаіць завяршэнне работы і падпісанне адпаведнага пагаднення паміж маладзёжнымі аб’яднаннямі краін, — пазначыў старшыня Пастаяннай камісіі, дадаўшы, што бакі таксама абмеркавалі перспектывы развіцця паміж жаночымі арганізацыямі. — Гэта асабліва актуальна ў Год беларускай жанчыны. Разлічваем, што тыя кантакты, якія ўжо былі наладжаны, у тым ліку падчас візіту Старшыні Савета Рэспублікі ў КНР у 2024 годзе, атрымаюць свой працяг сёлета». 

У ходзе рэгулярных кантактаў абмяркоўваюцца і перспектывы развіцця эканамічнага, інвестыцыйнага супрацоўніцтва, якое паспяхова развіваецца ў апошнія гады. «Назіраецца вельмі добрая дынаміка нашага ўзаемнага гандлю і інвестыцый. У нас рэалізуецца стратэгія прамыслова-тэхналагічнага развіцця, абвешчана двухгоддзе прамысловага развіцця. І, вядома, усе гэтыя пытанні з’яўляюцца таксама ў фокусе нашай увагі з асаблівым акцэнтам на далейшае паглыбленне гандлёва-эканамічнага і інвестыцыйнага супрацоўніцтва паміж нашымі краінамі», — дадаў Сяргей Алейнік.

Закранаючы тэму развіцця індустрыяльнага парка «Вялікі камень», старшыня Пастаяннай камісіі адзначыў, што колькасць яго рэзідэнтаў таксама б’е рэкорды. «Ужо звыш 170 кампаній з больш чым 20 краін з’яўляюцца рэзідэнтамі парка. І гэта таксама пастаянна з’яўляецца прадметам нашага абмеркавання. Мы са свайго боку ўсяляк садзейнічаем далейшаму развіццю гэтага вымярэння. Акрамя таго, гэта з’яўляецца прадметам развіцця нашага супрацоўніцтва ў рамках ініцыятывы «Адзін пояс, адзін шлях», — рэзюмаваў Сяргей Алейнік. 

Чжан Вэньчуань у размове з журналістамі адзначыў: «Супрацоўніцтва паміж парламентамі нашых краін ахоплівае не толькі заканадаўчую, але практычна ўсе сферы, — перакананы дыпламат. — Сёлета мы плануем умацаваць супрацоўніцтва ў заканадаўчай сферы, маладзёжнай палітыцы, турызме. Была пастаўлена мэта павысіць долю турызму ў ВУП краіны. У нас таксама такія планы. Мы хочам, каб турыстычны паток у нашы краіны павялічваўся. На працягу некалькіх гадоў у нас уведзены бязвізавы рэжым, пастаянна дадаюцца прамыя рэйсы. Тым больш, што ў Беларусі вельмі добрыя рэсурсы для развіцця турыстычнай індустрыі».

Данііл ХМЯЛЬНІЦКІ

Фота БелТА