У сераду ў Савеце Рэспублікі адбылося пасяджэнне арганізацыйнага камітэта па падрыхтоўцы і правядзенні ў 2026 годзе сумеснага беларуска-расійскага праекта «Цягнік Памяці». Сёлета патрыятычны праект пройдзе ў юбілейны пяты раз, у сувязі з чым яго арганізатары і каардынатары абяцаюць даволі насычаную праграму. У ходзе пасяджэння яны прыадчынілі некаторыя сакрэты будучага займальнага падарожжа па старонках нашай сумеснай гісторыі.

«На адборачных этапах у рэгіёнах нашай краіны ўзялі ўдзел больш за 11 995 маладых людзей»

Як адзначыў старшыня Пастаяннай камісіі Савета Рэспублікі па міжнародных справах і нацыянальнай бяспецы Сяргей Алейнік, агульная задача аргкамітэта і калег з Савета Федэрацыі — забяспечыць эфектыўную і якасную падрыхтоўку праекта «Цягнік Памяці». Ён нагадаў, што старт работы аргкамітэта быў дадзены Старшынёй Савета Рэспублікі Наталляй Качанавай 6 лютага. «Мы падрыхтавалі пратакол даручэнняў практычна па ўсіх напрамках падрыхтоўчай работы, — канкрэтызаваў Сяргей Алейнік. — Натуральна, мы вядзём работу і па ўсіх астатніх аспектах дзейнасці, якія звязаны з арганізацыйна-лагістычнымі пытаннямі, з пытаннямі забеспячэння правапарадку, медыцынскага забеспячэння, харчавання, інфармацыйнага асвятлення гэтага праекта». 

Старшыня Пастаяннай камісіі нагадаў, што на першым пасяджэнні аргкамітэта Міністэрству адукацыі і Міністэрству культуры сумесна з аблвыканкамамі і Мінскім гарвыканкамам даручалася забяспечыць распрацоўку праграмы знаходжання ўдзельнікаў «Цягніка Памяці» на тэрыторыі Беларусі. «Ад нашых расійскіх калег мы таксама атрымалі прапанову па мадэрнізацыі асобных элементаў экіпіроўкі ўдзельнікаў праекта. Таму прапануецца ў рамках нашага пасяджэння разгледзець пытанні, звязаныя з падрыхтоўкай праграм знаходжання ўдзельнікаў праекта, пытанні падрыхтоўкі экіпіроўкі і формы, узоры якіх прадстаўлены ў нашай студыі», — рэзюмаваў Сяргей Алейнік.

У сваю чаргу намеснік міністра адукацыі Кацярына Пятруцкая паведаміла, што адукацыйным ведамствам праводзіцца актыўная работа па падрыхтоўцы юбілейнага праекта. «У галоўнае ўпраўленне па адукацыі, камітэт па адукацыі Мінгарвыканкама накіравана палажэнне аб правядзенні рэспубліканскага конкурсу „Я патрыёт сваёй краіны“, якое рэгламентуе парадак правядзення конкурсу па адборы навучэнцаў для ўдзелу ў праекце, патрабаванні да ўдзельнікаў і работ, а таксама тэрміны правядзення конкурсу, — канстатавала яна. — Абласныя этапы па адборы канкурсантаў праводзяцца ў перыяд з 17 па 27 сакавіка. На адборачных этапах у рэгіёнах нашай краіны ўзялі ўдзел больш за 11 995 маладых людзей. У Нацыянальным цэнтры мастацкай творчасці дзяцей і моладзі 1 і 2 красавіка адбудзецца фінальны рэспубліканскі этап конкурсу „Я патрыёт сваёй краіны“, у якім прымуць удзел 105 канкурсантаў з усіх абласцей краіны і горада Мінска».

Закранаючы тэму адбору важатых для ўдзелу ў праекце, намеснік міністра адукацыі заявіла: «Конкурс праходзіць у тры этапы і ўключае такія заданні, як відэаконкурс, „Візітная картка“, конкурс арганізацыйна-метадычных матэрыялаў „Нам з важатымі па дарозе“. Конкурсны адбор важатых праводзіцца ў перыяд з лютага па красавік 2026 года, у рэгіянальных этапах конкурсу ўзялі ўдзел 630 педагагічных работнікаў, — канкрэтызавала яна. — Удзельнічаюць педагагічныя работнікі, якія маюць профільную педагагічную вышэйшую адукацыю і стаж педагагічнай працы не менш за тры гады. Адбор важатых на рэспубліканскім узроўні будзе ажыццёўлены 3 красавіка. З 70 прэтэндэнтаў будуць адабраны 15 найлепшых».

«Важна, каб удзельнікаў праекта пазнавалі»

У размове з журналістамі Кацярына Пятруцкая падкрэсліла, што праект мае добрую славу сярод маладых людзей. У праекце ўдзельнічаюць найлепшыя з лепшых. Маладыя людзі паказваюць, на што яны здольныя, паказваюць свае веды гісторыі, адданасць сваёй краіне, свае лепшыя напрацоўкі. «Праграма праекта вельмі насычаная. Яна мае свае асаблівасці. Вядома ж, асаблівае значэнне мы ўдзяляем наведванню памятных і знакавых месцаў, прысвечаных падзеям Вялікай Айчыннай вайны. Асобная ўвага будзе нададзена культурным і гістарычным аб’ектам. Вядома ж, Беларусі ёсць чым ганарыцца, і маладыя людзі наведаюць прамысловыя аб’екты нашай краіны, — пералічыла намеснік міністра адукацыі. — Пільная ўвага будзе ўдзелена культурнай і дасугавай праграме. Пройдуць шматлікія маладзёжныя сустрэчы, форумы, флэшмобы. Будуць арганізаваны адкрытыя прагляды гістарычных фільмаў пад адкрытым небам, арганізаваны творчыя сустрэчы з акцёрамі і пісьменнікамі. Я думаю, што юбілейны пяты праект надоўга запомніцца маладым людзям». 

Прадстаўнік адукацыйнага ведамства канстатавала, што цікавасць удзельнікаў да праекта з кожным годам усё больш і больш расце. «І колькасць удзельнікаў, якія прынялі ўдзел у рэгіянальных адборах, на парадак большая, чым у 2025 годзе, — адзначыла Кацярына Пятруцкая. — Асобную ўвагу мы ўдзяляем і экіпіроўцы маладых людзей. І сёння сумесна з „Беллегпрамам“ падрыхтаваны асобны камплект адзення для ўдзельнікаў праекта. Ён прадстаўлены тут, на выставе. Важна, каб гэтыя курткі былі непрамакальнымі, каб у іх было камфортна і, вядома ж, каб удзельнікаў праекта пазнавалі. Усе ўдзельнікі „Цягніка Памяці“ будуць мець аднолькавую экіпіроўку, але за падрыхтоўку гэтай экіпіроўкі традыцыйна адказвае наша краіна».

У сваю чаргу намеснік старшыні Беларускага дзяржаўнага канцэрна па вытворчасці і рэалізацыі тавараў лёгкай прамысловасці Наталля Мароз прадэманстравала элементы экіпіроўкі ўдзельнікаў юбілейнага праекта. Спецыяліст таксама расказала, якія ўмовы важна было ўлічыць пры стварэнні спецыяльнага адзення. «Сёлета нам было трошкі прасцей, таму што асноўная базавая калекцыя была распрацавана ўжо летась. Па просьбе арганізатараў яна засталася практычна ў ранейшым напаўненні, за выключэннем таго, што мы прапануем дапоўніць камізэлькай. Таксама ўкамплектоўваем камплект дадатковымі вырабамі: калі раней была адна майка-пола, то зараз іх будзе дзве. Акрамя таго, мы палепшылі экіпіроўку па сыравінным складзе, каб забяспечыць камфорт удзельнікаў пры дрэнных умовах надвор’я».

Паводле слоў Наталлі Мароз, зацверджаны камплект адзення ўдзельнікаў праекта сёння ўключае вятроўку, камплект маек-пола, футболку, талстоўку, кепку, шопер, панаму і заплечнік. Акрамя таго, адзенне важатых і ўдзельнікаў будзе трошкі адрознівацца па колеравай гаме.

«Менавіта наша краіна, як і шмат гадоў таму, сёння аб’ядноўвае патрыётаў розных дзяржаў»

Каардынатар праекта ад Савета Рэспублікі, член Пастаяннай камісіі Савета Рэспублікі па міжнародных справах і нацыянальнай бяспецы Аляксандр Лук’янаў у размове з журналістамі адзначыў, што вакол праекта «Цягнік Памяці» за гады яго правядзення ўжо сфарміравалася цэлая інфраструктура. «Праект сапраўды напаўняецца ініцыятывамі самой моладзі, працуе тэлеграм-канал, забяспечваецца інфармацыйны парадак дня. У маладых людзей фарміруецца цэлая супольнасць, падрыхтавана некалькі лінеек экіпіроўкі, — пералічыў сенатар. — Кіраўніцтва аблвыканкамаў і Мінскага гарвыканкама вельмі старанна падышлі да фарміравання кампактнай, але ў тым ліку напоўненай праграмы».

Аляксандр Лук’янаў нагадаў, што праект, заснаваны па ініцыятыве спікераў Савета Рэспублікі і Савета Федэрацыі, перш за ўсё абапіраецца на патрыятычную платформу. «Гэта і наведванне знакавых комплексаў, памятных месцаў. Сёлета зроблены акцэнт на адукацыйную частку, на прафарыентацыйную работу і наведванне прамысловых аб’ектаў, — пазначыў ён. — Важна, што сёлета ў праекце з’явяцца і новыя лакацыі, якія літаральна летась былі ўведзены ў эксплуатацыю. Гэта і музей Славы Магілёўшчыны, і Цэнтр дзіцячай творчасці ў Мінску». 

Важным пунктам у лінейцы падзей праекта, паводле слоў парламентарыя, стане і святкаванне Дня Незалежнасці Рэспублікі Беларусь. «Менавіта наша краіна, як і шмат гадоў таму, сёння аб’ядноўвае патрыётаў розных дзяржаў і з’яўляецца тым астраўком міру, стабільнасці і бяспекі, донарам, які транслюе гэты парадак для аднагодкаў з іншых дзяржаў. І, вядома, мы ганарымся гэтай магчымасцю. Упэўнены, што сёлета юбілейны „Цягнік Памяці“ зробіць новы віток і паскорыць працэс развіцця і ўмацавання дружбы паміж нашымі маладымі людзьмі».

Данііл ХМЯЛЬНІЦКІ,
фота аўтара