Па паведамленні Групы па інфармацыі і сувязі з грамадскасцю УСК па горадзе Мінску, Ленінскім (г. Мінска) раённым аддзелам Следчага камітэта ўстанаўліваюцца абставіны махлярства ў асабліва буйным памеры.

Па даных следства, жыхарцы сталіцы ў сярэдзіне кастрычніка патэлефанавала дзяўчына і прадставілася супрацоўніцай кампаніі па абслугоўванні дамафонаў. Яна паведаміла, што ў хуткім часе будзе праводзіцца замена абсталявання і выраб новых ключоў ад уваходных дзвярэй у пад’езд. Даверыўшыся суразмоўніцы, жанчына прадыктавала код з SMS-паведамлення, пасля чаго зносіны спыніліся.

У той жа дзень мінчанцы патэлефанавалі яшчэ раз — цяпер нібыта з БелДІЭ і ўказалі, што ашуканцы атрымалі доступ да яе звестак. 

У далейшым ёй паступалі неаднаразовыя званкі ад ілжэправаахоўнікаў, якія заяўлялі, што ўся маёмасць пацярпелай знаходзіцца пад іх кантролем і ад яе імя ажыццяўляюцца спробы пераводаў буйных сум на тэрыторыю замежных дзяржаў. Акрамя таго, жанчыне прыгразілі вобыскам, падчас якога будуць канфіскаваныя ўсе наяўныя зберажэнні і камп’ютарна-тэхнічныя прылады. Каб «выратаваць» грошы, псеўдасупрацоўнік запатрабаваў перадаць іх для праверкі і дэкларавання ў «банкаўскую арганізацыю», забараніўшы каму-небудзь расказваць аб тым, што адбываецца.

У кватэры знаходзіліся грашовыя сродкі не толькі пацярпелай, але і яе маці, пра што жанчына расказала лжэправаахоўнікам. Выканаўшы ўсе інструкцыі, мінчанка ў той жа вечар перадала зберажэнні — 230 тысяч рублёў — «супрацоўніку Нацыянальнага банка», які прыехаў да яе дома. Ім аказаўся 18-гадовы жыхар Докшыцкага раёна, які ўдзельнічаў у «спецыяльнай аперацыі Камітэта дзяржаўнага кантролю».

Як высветлілі следчыя, у той дзень маладому чалавеку таксама патэлефанавалі са службы па замене дамафонаў, і калі высветлілася, што ён пражывае ў прыватным доме, «прадстаўнікі» арганізацыі паведамілі аб сфарміраванай заяўцы і настаялі на неабходнасці яе адмены. Паверыўшы суразмоўцам, юнак прадыктаваў код з SMS, які прыйшоў на тэлефон. На працягу некалькіх хвілін яму патэлефанавалі зноў, на гэты раз — нібыта з Камітэта дзяржаўнага кантролю. Хлопца запэўнілі, што да гэтага ён меў зносіны з ашуканцамі, якія завалодалі яго персанальнымі данымі, і цяпер для іх вяртання патрабуецца атрымаць характарыстыку ад «праваахоўных органаў», паўдзельнічаўшы ў спецыяльнай аперацыі ў Мінску.

У сталіцы, прытрымліваючыся ўказанняў ілжэправаахоўнікаў, юнак забраў «пакет з дакументамі». Змесціва ўпакоўкі малады чалавек не правяраў, саму «пасылку» было неабходна вывезці на тэрыторыю Расійскай Федэрацыі. Для гэтага куратары выклікалі таксі да аэрапорта і запатрабавалі набыць білет на самалёт з вылетам праз 2 гадзіны.

У тую ноч пералёт так і не адбыўся з прычыны затрымкі рэйса. Да раніцы да юнака звярнуліся ўжо сапраўдныя супрацоўнікі міліцыі і патлумачылі, што ўвесь гэты час ён выконваў указанні махляроў і, сам таго не ўсведамляючы, стаў удзельнікам злачыннай схемы па завалоданні грашовымі сродкамі. Ускрыўшы ўпакоўку, у якой нібыта знаходзіліся дакументы, праваахоўнікі знайшлі купюры розных валют, якія ў агульнай суме перавысілі 230 тысяч рублёў. Грашовыя сродкі ўдалося выратаваць, яны будуць вернуты законнаму ўладальніку.

Па гэтым факце Ленінскім (г. Мінска) раённым аддзелам Следчага камітэта ўзбуджана крымінальная справа па артыкуле махлярства, учыненае арганізаванай групай у асабліва буйным памеры Крымінальнага кодэкса. Таксама праводзяцца следчыя дзеянні і аператыўна-вышуковыя мерапрыемствы, накіраваныя на ўстанаўленне асоб, якія маюць дачыненне да ўчынення злачынства.

Следчы камітэт у чарговы раз нагадвае: супрацоўнікі праваахоўных органаў не тэлефануюць грамадзянам з патрабаваннямі перадаць грашовыя сродкі, не праводзяць «спецыяльныя аперацыі» па тэлефоне і не просяць прадаваць маёмасць. Пры паступленні падобных званкоў трэба неадкладна спыніць размову і звярнуцца ў міліцыю.