Па дадзеных крыніцы, перагаворы працягваліся больш за гадзіну. Адзначаецца, што падчас іх расійская і ўкраінская дэлегацыі размаўлялі на рускай мове.

Дэлегацыі падрабязна абмеркавалі абмены, аб выніках будзе пазней заяўлена афіцыйна.

У сваю чаргу прадстаўнік МЗС Турцыі паведаміў, што расійска-ўкраінскія перагаворы завяршыліся «не негатыўна».

Вядома таксама, што трэці раўнд перагавораў Украіны і Расіі будзе, ён адбудзецца «на працягу нейкага часу».

Прамыя перагаворы паміж Расіяй і Украінай былі адноўлены 16 мая пасля больш як трохгадовага перапынку. Першая сустрэча праходзіла ў палацы Далмабахчы ў Стамбуле і доўжылася каля дзвюх гадзін. Адным з яе галоўных вынікаў стала гатоўнасць Масквы і Кіева працягваць далейшы дыялог і абмяняцца бачаннем магчымага спынення агню. Бакі таксама дамовіліся аб маштабным абмене палоннымі па формуле «1000 на 1000», гэта дамоўленасць пазней была выканана.