Як паведамілі рэдакцыі ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды, калі ў аўторак на большай частцы тэрыторыі краіны пройдуць дажджы, то ў сярэдзіне тыдня надвор’е зменіцца.

Чакаецца, што 21 і 22 кастрычніка ўмовы надвор’я ў краіне будзе вызначаць заходняя перыферыя шырокага антыцыклону, цэнтр якога перамесціцца з Яраслаўскай вобласці Расіі на Верхнюю Волгу. Будзе воблачна з праясненнямі.

У сераду ноччу месцамі па краіне пройдуць невялікія кароткачасовыя дажджы, днём пераважна без ападкаў. Вецер паўднёва-ўсходні парывісты, удзень месцамі па захадзе моцны парывісты. Тэмпература паветра ўначы будзе вагацца ад плюс 3 °C па паўночным усходзе Беларусі да 11 °C вышэй за нуль па захадзе. Максімальная тэмпература днём чакаецца ў межах 11–18 °С цяпла.

У чацвер таксама будзе пераважна без ападкаў, толькі днём месцамі па паўднёвым захадзе краіны чакаюцца кароткачасовыя дажджы. Вецер паўднёва-ўсходні парывісты, удзень месцамі на захадзе Беларусі моцны парывісты. Тэмпература паветра ўначы — ад 4 да 10 °С вышэй за нуль, па захадзе — да плюс 12 °С. Удзень сонца яшчэ прагрэе паветра да 12–18 °С цяпла.

Сяргей КУРКАЧ