Інцыдэнт здарыўся 13 жніўня ў агульным двары паміж дамамі па вул. Ульянаўскай, 41, і вул. Бабруйскай, 19. У выніку частковага абвальвання выцяжкі пашкоджаным аказаўся Ford Fiesta: машына засталася без шкла і атрымала ўвагнутасці кузава.

Паводле інфармацыі ЖКГ Кастрычніцкага раёна, здарэнне адбылося з прычыны зрыву часовых мацаванняў, у выніку чаго бляшаны элемент упаў на аўтамабіль. Вентыляцыйная сістэма належыць сетцы рэстаранаў хуткага харчавання KFC.

— На момант абследавання ўласнікам вентыляцыі праводзіліся аднаўленчыя работы, а месца абвальвання было агароджанае сігнальнай стужкай, — расказалі камунальнікі і адзначылі, што транспартны сродак быў прыпаркаваны ў неўстаноўленым месцы — у парушэнне правілаў дарожнага руху.

Вядома, што ўласнік легкавушкі выклікаў міліцыю — па гэтым факце распачатая праверка.