Сураж падзелены ракой на дзве няроўныя часткі. Усяго тут пражываюць 773 чалавекі, з іх каля 40 — на меншай частцы населенага пункта. Дапамагае дабрацца людзям з аднаго берага на іншы водны транспарт. Як расказаў намеснік начальніка ГП «ЖРЭП Віцебскага раёна» Юрый Сарокін, людзей перавозіць або катэр, або паром. «Па Заходняй Дзвіне курсіруе „Тытанік“, калі ўзровень вады ў рацэ падымаецца. Звычайна гэта адбываецца вясной або ў перыяд моцных дажджоў», — удакладніў ён. 

Пастаянны пасажыр «Тытаніка» — Ірына Доўгая. «Працую ў Суражскай бібліятэцы. Кожны дзень неабходна дабірацца на работу праз раку. Добра, што ёсць магчымасць пераправіцца на катэры. Па дарозе аб’езд вялікі, праз Рубу, гэта парадку 100 км», — расказала яна.

Кіруе «Тытанікам» ужо больш за 15 гадоў матарыст Антон Белавусаў. «Машына моцная, хоць ужо і ва ўзросце — ёй тры дзясяткі гадоў. Аднак яна спраўна выконвае сваю функцыю — дастаўку людзей. Можа перавозіць 10 чалавек. Яшчэ катэр служыць для буксіроўкі воднага транспарту. Дарэчы, у „Тытаніка“ ёсць нават каюта, пры неабходнасці ў ёй можна адпачыць», — расказаў ён. 

Пры апусканні ўзроўню вады ў рацэ запрацуе паром. «Яго ўмяшчальнасць нашмат большая. Ён служыць для перапраўкі не толькі людзей, але і транспартных сродкаў. У 2020 годзе была праведзена яго мадэрнізацыя — грузападымальнасць павялічылася да 120 т. На сённяшні дзень можна бесперашкодна перапраўляць нават лесавозы, камбайны», — дадаў Юрый Сарокін.