У фокусе ўвагі — тэма процідзеяння кіберзлачынствам, устанаўлення асоб, якія іх здзейснілі. Таксама ў ходзе пасяджэння разглядаліся эфектыўнасць барацьбы з незаконным абаротам наркотыкаў, псіхатропных рэчываў і іх аналагаў, прафілактыка спажывання. Пра гэта карэспандэнту «Звязды» паведамілі ў прэс-службе міліцэйскага ведамства. 

Акрамя таго, удзельнікі пасяджэння абмеркавалі арганізацыю работы аператыўна-дзяжурных службаў АУС вобласці, меры па абароне будынкаў і збудаванняў органаў унутраных спраў, іх інжынерна-тэхнічнай умацаванасці.

На пасяджэнні калегіі кіраўнік МУС Іван Кубракоў указаў на недастатковую работу па супрацьдзеянні наркапагрозе. У рэгіёне практычна ва ўсіх кірунках па дадзенай лініі горшыя паказчыкі.

Іван Кубракоў пазначыў начальніку УУС Аляксандру Купчэні неабходнасць перабудаваць кіраванне тэрытарыяльнымі падраздзяленнямі і даручыў сфарміраваць працаздольны калектыў:

— Унікайце ў праблемы людзей! Запомніце: не будзе згуртаванай каманды — не будзе нічога! Ва ўсім павінны быць пачуццё локця і карпаратыўнасць — адзіная каманда, узаемадапамога і агульная адказнасць за вынік! У вобласці наркапагроза — асноўная праблема, і ў яе ўцягваецца моладзь. Дапускаць гэтага нельга! Пытанне трэба вырашаць кардынальна! 

Па выніках ацэнкі службовай дзейнасці міністрам прынята рашэнне аб паніжэнні кіраўніка УНіПГЛ на займанай пасадзе.

Заслухаўшы даклады па другім пытанні, Іван Кубракоў завастрыў увагу на паведамленнях грамадзян, якія паўторна паступаюць у аператыўна-дзяжурную службу, і арганізацыі работы з імі. Таксама кіраўнік ведамства пацікавіўся колькасцю груп хуткага рэагавання і даручыў перагледзець штат АДС у буйных райаддзелах. 

Асобны акцэнт быў зроблены на кантролі за асабовым складам, у тым ліку пры дапамозе сістэм відэаназірання. Міністр адзначыў неабходнасць павышэння навыкаў супрацоўнікаў, правядзення трэніровак па дзеяннях у асаблівых умовах, выкарыстання ў поўным аб’ёме наяўных тэхнічных сродкаў абароны будынкаў АУС. Напрыклад, пераймаючы вопыт калег з Дэпартамента аховы.

Па трэцім пытанні калегіі падкрэслена, што барацьба з кіберпагрозамі дае адчувальныя вынікі — асабліва ў частцы прадухіленых злачынстваў. Рэгіён пакуль не ў лідарах, але разрыў з іншымі мінімальны: Аляксандр Купчэня запэўніў міністра, што рух наперад па гэтым кірунку будзе працягнуты. Узаемадзеянне з банкаўскім сектарам і правядзенне прафілактычных мерапрыемстваў з насельніцтвам узмоцняць.

Данііл ХМЯЛЬНІЦКІ
Фота МУС