Акцыя «Грамадзянская мужнасць» стартавала ў 2009 годзе. Штогод узнагароды ад кіраўніцтва ўпраўлення ўнутраных спраў уручаюць тым, хто, не задумваючыся аб асабістай бяспецы, прыходзіць на дапамогу суайчыннікам, інфармуе праваахоўнікаў аб беззаконні, дапамагае затрымліваць злачынцаў.
Сёлета лаўрэатамі акцыі ў Віцебскай вобласці сталі пяць чалавек. Жыхар Віцебска Аляксей Ганчароў адзначаны ў намінацыі «За смеласць і рашучасць»: мужчына затрымаў грамадзяніна, які скраў тавар у адным з магазінаў абласнога цэнтра. Пераможцам у намінацыі «За неабыякавасць» стаў Васіль Мацулевіч. Мужчына дапамог вярнуць барсетку з круглай грашовай сумай гаспадару, які згубіў яе з машыны.
Самым юным абаронцам правапарадку па выніках мінулага года стаў 11-класнік, выхаванец ваенна-патрыятычнага клуба «Віцязь», які заснаваны на базе вайсковай часці 5524, Іван Гамзюк з Гарадка. Напрыканцы лета на адной з абочын райцэнтра малады чалавек заўважыў мужчыну з крывёй на шыі і сур’ёзнымі пашкоджаннямі. У пошуках бінтоў і сродкаў першай дапамогі Іван зайшоў у найбліжэйшы дом, дзе ўбачыў дзвюх жанчын з нажавымі раненнямі.
Усім пацярпелым школьнік аказаў першую медыцынскую дапамогу і выклікаў «хуткую». Знайсці злачынца не ўдалося, ён паспеў пакінуць месца здарэння, а пасля скончыў жыццё самагубствам.
Кібермахляры, нягледзячы на актыўную інфармацыйную работу праваахоўнікаў з насельніцтвам, дагэтуль працягваюць выманьваць немалыя грошы ў даверлівых пажылых людзей. Так, вясной 2024 года віцябчанін Уладзімір Гірс вяртаўся дадому. На лесвічнай пляцоўцы з яго 84-гадовай маці размаўляў малады чалавек. Заўважыўшы сына, пажылая жанчына пацікавілася, як яго здароўе, ці адпусцілі яго з бальніцы. Выявілася, што грамадзянцы на мабільны тэлефон пазваніў махляр, які прадставіўся следчым, і расказаў, што яе сын трапіў у ДТЗ, знаходзіцца ў бальніцы ў цяжкім стане, а на яго лячэнне патрабуецца больш за 10 тысяч рублёў. Уладзімір Гірс затрымаў кур’ера, забраў перададзеныя яму грошы і перадаў злачынца праваахоўнікам. Мужчына стаў пераможцам у намінацыі «За аператыўнасць».
Такую ж узнагароду сёлета атрымаў і Ігар Кудрашоў, які папярэдзіў распаўсюджванне псіхатропнага рэчыва. Знаходзячыся каля апоўначы паблізу дома па вуліцы Савецкай у Віцебску, Ігар Валер’евіч заўважыў падазронага маладога чалавека, які раскладваў скруткі з небяспечным псіхатропам. Неабыякавы грамадзянін аператыўна паведаміў аб убачаным у міліцыю, праваахоўнікі па гарачых слядах затрымалі закладчыка, які аказаўся расіянінам і меў пры сабе яшчэ каля 200 грамаў наркатычнага рэчыва.
Начальнік УУС Віцебскага аблвыканкама генерал-маёр міліцыі Андрэй Любімаў падзякаваў лаўрэатам за неабыякавасць і адказны падыход да забеспячэння і захавання грамадскага парадку ў паўночным рэгіёне.
Фота БелТА
