Кожны год у лістападзе, напярэдадні Дня сельскай гаспадаркі і перапрацоўчай прамысловасці, беларуская сталіца па добрай традыцыі прымае прадстаўніц сферы аграпрамысловага комплексу з усёй Беларусі. Год беларускай жанчыны — юбілейны для гэтага яркага і знакавага мерапрыемства. 

Ушанаванне працаўніц вёскі праходзіць ужо ў пяты раз — па ініцыятыве і пад эгідай Беларускага саюза жанчын сумесна з Міністэрствам сельскай гаспадаркі і харчавання Рэспублікі Беларусь і Беларускім прафесійным саюзам работнікаў АПК.

Жаночы ўклад — асаблівы 

У Вялікім тэатры Беларусі, дзе традыцыйна праходзіць ушанаванне, сёлета сабралася больш за 600 сельскіх жанчын з усіх абласцей краіны. Кожная вобласць абрала сваіх кандыдатак — жанчын, што працуюць у рэальным сектары аграпрамысловага комплексу. Гэта людзі «ад зямлі», практыкі і высокія прафесіяналы — аграномы, паляводы, заатэхнікі, супрацоўніцы малочна-таварных комплексаў... 

За кожным поспехам аграрнай сферы раёна або вобласці стаяць канкрэтныя прафесіяналы з іх жаданнем і ўменнем працаваць на зямлі. У гэты вечар у святочна асветленай зале Вялікага тэатра сядзелі тыя жанчыны, чыя праца стварае аснову харчовай бяспекі нашага грамадства і падмурак эканомікі Беларусі, чый прафесіяналізм і вялізная любоў да роднай зямлі па праву сталі духоўна-маральнымі арыенцірамі сучаснасці. 

Таму і гучалі са сцэны ў іх адрас словы падзякі. 

— Не першы год мы ўшаноўваем гераінь нашага часу, нашых працаўніц вёскі, — падкрэсліла старшыня ГА «БСЖ» Вольга Шпілеўская. 

— Жанчынам заўсёды надаецца асаблівая ўвага ў нашай краіне, — адзначыла яна. — Не толькі ў Год беларускай жанчыны. І гэты форум — таму пацвярджэнне: гэта не даніна модзе бягучага года, пяты раз мы збіраемся ў гэтым тэатры, каб выказаць вялікае чалавечае «дзякуй» жанчынам, якія ўносяць свой уклад у харчовую бяспеку краіны. Сёння мы можам накарміць нашай шыкоўнай малочнай прадукцыяй тры такія Беларусі, як мы. Упэўнена, што ў наступным годзе мы скажам, што гатовыя накарміць ужо чатыры такія краіны. 

«Усё, што ў нас атрымліваецца, мы робім пад мірным небам нашай краіны, — дадала лідар жаночага руху Беларусі. — Мабыць, гэта самы каштоўны і галоўны здабытак, якому зайздросцяць вельмі многія людзі, што жывуць у іншых умовах. Сёння гэта тая каштоўнасць, якую нам з вамі таксама трэба будзе захаваць. І жаночы ўклад тут асаблівы» 

Сімвал мацярынскай клопату 

Старшыня Пастаяннай камісіі Савета Рэспублікі Нацыянальнага Сходу Рэспублікі Беларусь па адукацыі, навуцы, культуры і сацыяльным развіцці Наталля Паўлючэнка зачытала са сцэны Вялікага тэатра віншавальны адрас у гонар сельскіх жанчын ад Старшыні Савета Рэспублікі Нацыянальнага сходу Рэспублікі Беларусь Наталлі Качанавай. «У Год беларускай жанчыны мы з асаблівым гонарам і трапятаннем ушаноўваем сельскіх працаўніц, — гаворыцца ў адрасе. — Кожнае чацвёртае сельгаспрадпрыемства Беларусі ўзначальвае жанчына, а значыць, там пануюць парадак, стабільнасць і вытворчая дысцыпліна. Жанчына і зямля — аднаго роду. Вы дамагліся многага: корміце сям’ю і велізарную краіну, і кожны кавалачак хлеба на нашым стале — гэта сімвал вашага мацярынскай клопату, духоўнай сілы і бязмежнай любові. Калі за мяжой кажуць «якасць натуральных беларускіх прадуктаў пад брэндам „Зроблена ў Беларусі“, гэта знак прызнання вашага вялізнага ўкладу ва ўмацаванне іміджу Рэспублікі Беларусь як краіны гасціннай, хлебасольнай і міралюбівай». 

Міністр сельскай гаспадаркі і харчавання Рэспублікі Беларусь Юрый Горлаў агучыў са сцэны Вялікага тэатра некалькі лічбаў статыстыкі: 

— У сельскай гаспадарцы працуе 42% жанчын ад усёй колькасці працуючых, — адзначыў міністр. — У перапрацоўчай прамысловасці колькасць жанчын дасягае 60%. А галіна жывёлагадоўлі наогул мае жаночы твар: 80% жанчын працуе ў гэтай найскладанейшай галіне сельскай гаспадаркі. 

Кіраўнік дзяржавы заўсёды з любоўю і з вялікай павагай ставіцца да сельскай працы, асабліва калі працуе жанчына, звярнуў увагу слухачоў Юрый Горлаў. — У нашай дзяржаве робіцца ўсё, каб праца на вёсцы была прасцей, лягчэй, — падкрэсліў ён. — І вы бачыце, наколькі наш Прэзідэнт звяртае на гэта ўвагу. Кожны год мы закупляем новую сучасную тэхніку, энерганасычаныя трактары, сёлета — пабудавалі больш за 500 прафілакторыяў. Можна ганарыцца тымі паказчыкамі, якіх дасягнулі, — дадаў міністр. — Да рэкорднага 2025 года прырастаем сёлета па многіх паказчыках. Гэта сапраўды тая дынаміка, тэндэнцыя, якую задае нам наш Прэзідэнт. І мы не падводзім кіраўніка дзяржавы. Мы робім усё, каб наш беларускі народ жыў з кожным годам лепш і лепш. 

Натхняльны прыклад 

Мэта ўрачыстага мерапрыемства нязменная — паказаць грамадству ўклад выдатных сельскіх жанчын, а ім — паказаць сталіцу, Вялікі тэатр. Асаблівую каштоўнасць ушанавання працаўніц вёскі арганізатары бачаць у аб’яднанні і актывізацыі сельскіх жанчын у стваральнай дзейнасці на карысць Рэспублікі Беларусь. Свята ў іх гонар запомніцца ім на ўсё жыццё, і гэта — дзейсны спосаб павышэння статусу і ролі сельскіх жанчын у развіцці і ўмацаванні грамадзянскай супольнасці. 

Гэтыя жанчыны паспяваюць усё: акрамя прафесійных дасягненняў яны яшчэ і маці, прычым многія з тых, хто сабраўся ў зале — шматдзетныя. Менавіта такія прадстаўніцы прыгожага полу могуць служыць натхняльным прыкладам для маладога пакалення, дэманструючы сілу, цярпенне, уменне сумяшчаць розныя сферы жыцця. Менавіта яны перадаюць юным дзяўчатам важныя маральныя арыенціры. 

Кранальнай часткай вечара стаў момант, калі на сцэну Вялікага тэатра падняліся жанчыны, якія прадставілі кожную з шасці абласцей Беларусі — голас і гонар свайго рэгіёна. Тыя, чые імёны і меркаванні маюць вялікую вагу ў сваім раёне, чые вынікі працы бачныя на фермах і ў палях. І кожную з іх можна лічыць неацэнным здабыткам краіны.

Аляксандра АНЦЭЛЕВІЧ

Фота Валерыя КАРТУЛЯ