У вёску зайшла заражаная шаленствам ліса. Яна накінулася і пакусала сабаку. Пра здарэнне вяскоўцы расказалі спецыялістам Пінскай раённай ветэрынарнай станцыі. Біялагічны матэрыял драпежніцы быў узяты на даследаванне, якое паказала наяўнасць у яе віруса шаленства.

Пінскі райвыканкам у сувязі з гэтым аб’явіў у Вяляцічах каранцін. «У вёсцы ўведзены спецыяльныя абмежавальныя і прафілактычныя мерапрыемствы, накіраваныя на прадухіленне распаўсюджвання віруса. Спецыялісты выяўляюць вяскоўцаў, якія маглі кантактаваць з хворай жывёлай і маюць патрэбу ў тэрміновай прафілактычнай вакцынацыі», — расказалі ў Пінскім райвыканкаме.

Спецыялісты таксама правераць выкананне гаспадарамі правілаў утрымання свойскай жывёлы. Асаблівая ўвага будзе ўдзелена рэгістрацыі, вакцынацыі і выгулу гадаванцаў.

Фота: pixabay.com