У якім уборы сустракаць Новы год, расказала БелТА выкладчык па іміджы і стылі Нацыянальнай школы прыгажосці, кансультант па іміджы Юлія Сержан.

«Новы год — асаблівае свята і этап абнаўлення. У гэты раз мы будзем сустракаць год Вогненнага Каня. Яго можна разглядаць як сімвал дынамікі, сілы, сабранасці, імпульсу руху. І, адпаведна, адзенне павінна выяўляцца менавіта ў гэтым кірунку. Варта выкарыстоўваць не проста яркія рэчы, бліскаўкі, паеткі, а больш вытрыманыя, глыбокія колеры. Напрыклад, калі мы бярэм чырвоны, то лепш сысці ў бок больш статуснага і сабранага віннага колеру. Актуальны не толькі вінны, але і бардо, тэракотавае, шакаладнае адценне. Класічны чорны любяць вельмі многія. Яго можна дапоўніць жоўтым золатам або бронзай», — адзначыла Юлія Сержан.

Паводле яе, сёлета людзі адыходзяць ад ціхай раскошы. Хочацца больш колеру, таму не варта выкарыстоўваць шэрыя, пыльныя, бруднаватыя, а таксама халодныя сінія адценні. Кіслотныя і неонавыя колеры напэўна патанняюць вобраз, а белы без цікавай фактуры і дадатковых залатых дэталяў будзе сумнаваты.

«Калі гаворым пра крой, то актуальныя прыталеныя сілуэты, выразныя лініі і фактуры, якія быццам ствараюць дынаміку. Калі інтэрпрэтаваць вобраз моцнага каня ў адзенне, то ў нас павінны быць выразныя плечы, акцэнт на талію і мінімум візуальнага хаосу. Варта прыбраць розныя рушы, якія адцягваюць увагу», — дадала Юлія Сержан.

Яна падкрэсліла, што сярод фактур варта выбіраць аксаміт, шоўк, атлас. Пры гэтым абавязкова якаснае выкананне, бо танны штучны шоўк або атлас могуць глядзецца дрэнна. 

Юлія Сержан таксама заўважыла, што нават самы просты вобраз можна дапоўніць упрыгажэннямі і аксесуарамі. Сёння беларускія дызайнеры прапануюць шмат унікальных варыянтаў, якія дапамогуць вылучыцца з натоўпу і выглядаць выразней. А калі вы абмежаваныя ў бюджэце, то можна купіць вырабы з калекцый мінулых сезонаў па больш прыемных цэнах. Цікавыя ўпрыгажэнні з чорнымі або чырвонымі камянямі ў золаце, смарагдам. Вобраз можна дапоўніць чырвонымі туфлямі-лодачкамі і чырвонай памадай.

«Але самае галоўнае, у сваім уборы вы павінны адчуваць сябе ўпэўнена і прыгожа. Мы не павінны забываць, для чаго складаем наш імідж: выключна для ўнутранага стану кайфу ад сябе, таму вобраз павінен вам падабацца і дапаўняць ваш стан. Не варта выбіраць адзенне, якое дастаўляе вам дыскамфорт, якім бы прыгожым яно ні было. Заўсёды варта знаходзіць кампраміс паміж элегантнасцю і камфортам. Напрыклад, у некаторых сітуацыях вам не падыдуць абцасы. Таму, нягледзячы на рэкамендацыі стылістаў, галоўнае вызначальнае адчуванне — гэта калі вы глядзіце ў люстэрка і адчуваеце сябе неверагодным чалавекам», — падсумавала Юлія Сержан.