Прэзідэнт Беларусі Аляксандр Лукашэнка заслухаў даклад міністра сельскай гаспадаркі і харчавання Юрыя Горлава, паведамілі ў прэс-службе беларускага лідара.

Кіраўніку дзяржавы даложана аб завяршэнні ўборкі збожжа, сяўбе азімых і закладцы прадукцыі новага ўраджаю ў стабілізацыйныя фонды. Кіраўнік Мінсельгасхарча далажыў, што збожжавыя і зернебабовыя культуры ўбраны на 99,8 % плошчаў. Намалочана больш за 9,1 мільёна тон збожжа з улікам рапсу.

Пад ураджай будучага года трэба пасеяць азімыя збожжавыя на плошчы 1,5 мільёна тон гектараў, а таксама больш за 450 тысяч гектараў азімага рапсу. Сяўба азімых цяпер у актыўнай фазе, стаіць задача завяршыць яе максімум да 5 кастрычніка.

Аляксандр Лукашэнка асабліва звярнуў увагу на ўборку саломы з палёў, забеспячэнне неабходных тэрмінаў і якасці ўзворвання глебы з захаваннем усіх тэхналогій. Адначасова аграрыі прыступілі да ўборкі гародніны, уключаючы бульбу і цукровыя буракі.

Кіраўнік дзяржавы цікавіўся, як ідзе закладка ўраджаю агародніны ў стабілізацыйныя фонды. Дзяржзаказ неабходна цалкам выканаць да 15 лістапада. Міністр запэўніў, што гэта будзе зроблена ў тэрмін.

«Паскарацца, узмацняцца і якасна выконваць пастаўленыя задачы»

Збожжавыя і зернебабовыя культуры ўбраны на 99,8 % плошчаў, падзяліўся з журналістамі падрабязнасцямі свайго даклада кіраўніку дзяржавы міністр сельскай гаспадаркі і харчавання Юрый Горлаў. Па словах кіраўніка ведамства, аграрыям краіны засталося ўбраць збожжавых на плошчы 4,8 тысячы гектараў. «Традыцыйна мы ўбіраем у верасні грэчку і проса. З улікам збожжавых культур на сённяшні дзень засталося ўбраць 20 тысяч гектараў такіх плошчаў. І ў верасні мы, як правіла, яшчэ ўбіраем яравы рапс, які застаўся на плошчы 24 тысячы гектараў, — канкрэтызаваў міністр. — Гэта планавая работа, якую мы выконваем у адпаведнасці з нашым графікам уборкі культур». 

Па стане на 2 верасня, працягнуў Юрый Горлаў, намалочана 9 мільёнаў 141 тысяча тон збожжа з улікам рапсу. «Гэтая работа працягваецца і, адпаведна, крыху больш за 9,2 мільёна тон збожжа з улікам рапсу, грэчкі і проса ў гэтым месяцы намалоцім», — удакладніў кіраўнік ведамства.

Прэзідэнту таксама было даложана аб рабоце па закладцы ўраджаю будучага года. Па словах міністра, аграрыям краіны трэба пасеяць збожжавых культур на плошчы 1,5 мільёна гектараў. Сяўбу неабходна завяршыць да 5 кастрычніка. «Сёння вядзецца актыўная работа, на што звярнуў увагу кіраўнік дзяржавы, па ўборцы саломы з палёў, актыўнае ворыва. Таму тут, вядома, трэба паскарацца, узмацняцца і якасна выконваць пастаўленыя задачы, прадугледжваць усе тэхналагічныя нюансы», — звярнуў увагу Юрый Горлаў. 

Міністр дадаў, што сяўба збожжавых культур пачата ўсімі абласцямі краіны. Беларускія аграрыі пачалі сеяць азімую пшаніцу, прыступаюць да сяўбы азімага ячменю. Плануецца, што сяўбу гэтых культур працаўнікі вёскі завершаць да 20 верасня. «Паралельна мы прыступаем да сяўбы азімага жыта, азімага трыцікале. Гэта той набор збожжавых культур, якія мы павінны пасеяць у верасні, — падкрэсліў кіраўнік ведамства. — Як кажуць, увосень — работ восем, таму, вядома, верасень для аграрыяў адзін з самых напружаных месяцаў. І таму мы не толькі павінны завяршыць да канца ўборку, пасеяць збожжавыя культуры, але і прыбраць гародніну, шэраг тэхнічных культур, якія сёння актыўна прыбіраем на палях». 

Па словах Юрыя Горлава, працаўнікі вёскі прыступілі да копцы цукровых буракоў і бульбы. Што датычыцца «другога хлеба», аграрыям неабходна ўбраць 22 тысячы гектараў бульбы, што супастаўна з мінулым сезонам. Як правіла, больш за 60 % гэтай культуры вырошчваюць сялянска-фермерскія гаспадаркі. Астатні аб’ём прыпадае на сельгасарганізацыі. «Ураджайнасць на сённяшні дзень ідзе з павелічэннем да мінулага года — 370 цэнтнераў з гектара», — канстатаваў Юрый Горлаў.

Ён дадаў, што аграрыямі краіны выкарыстоўваецца шырокая наменклатура сартоў бульбы — ад ранніх да сярэдняспелых, позніх. У іх ліку міністр асабліва вылучыў такія айчынныя сорты, як «Першацвет», які добра зарэкамендаваў сябе, «Скарб», «Ласунак». Улічваюцца розныя характарыстыкі. Для захоўвання падбіраюцца сарты, якія дазваляюць забяспечыць у міжсезонне айчыннай бульбай гандлёвыя сеткі.

Таксама сельгасвытворцы прыступілі да ўборкі гародніны. Кіраўнік дзяржавы звярнуў асаблівую ўвагу профільнага міністра на закладку стабфондаў. Гэта ўжо дзяржзаказ, які неабходна выканаць да 15 лістапада. «Абсалютна няма ніякіх падстаў не выканаць дадзенае даручэнне і не забяспечыць краіну так званым „баршчовым наборам“, — выказаў упэўненасць кіраўнік ведамства. — Прынамсі, зыходзячы з аналізу бягучага года, бачым, што на прылаўках нашых магазінаў уся гэтая гародніна ёсць».

Ён падкрэсліў, што ўборка вядзецца ў планавым парадку. На кантролі — падрыхтоўка агароднінасховішчаў да прыёму ўраджаю. «Усе сховішчы падрыхтаваныя, — адзначыў Юрый Горлаў. — Падчас маніторынгу выяўляюцца нязначныя парушэнні, але яны аператыўна ўхіляюцца. Таму сёлета, як і летась, мы дастаткова нядрэнна падрыхтаваліся, і выканаем гэтую работу якасна». 

Данііл ХМЯЛЬНІЦКІ

Горлаў: Ураджайнасць бульбы ў Беларусі перавышае леташні ўзровень