Удзельнікі форуму сабраліся ў святым і знакавым месцы — ля брацкай магілы савецкіх воінаў і партызанаў, якія загінулі ў гады Вялікай Айчыннай вайны. Як было падкрэслена, ускладанне кветак — гэта не проста традыцыя, а агульны грамадзянскі абавязак і момант цішыні, у якім беларусы дзякуюць тым, хто аддаў жыццё за незалежнасць і мірнае неба, за будучыню, у якой сёння ёсць магчымасць жыць і працаваць, за магчымасць будаваць і развіваць суверэнную і незалежную дзяржаву — Рэспубліку Беларусь.

Удзел у цырымоніі прынялі міністр інфармацыі Дзмітрый Жук, кіраўнікі рэспубліканскіх сродкаў масавай інфармацыі, дэлегацыі з усіх абласцей краіны. 

Як адзначыў старшыня праўлення Беларускага саюза журналістаў Андрэй Крывашэеў, пачынаць медыяфорум з ускладання кветак вельмі сімвалічна. «Гэта больш чым рытуал, гэта вялікая беларуская народная, нацыянальная традыцыя, паколькі і мы, журналісты, у сваёй працы абапіраемся на велізарны подзвіг старэйшага пакалення, усіх тых франтавых журналістаў, падпольнай прэсы, якія ў гады Вялікай Айчыннай вайны інфармацыйна, паводле сэнсаў, разграмілі, перамаглі нацысцкую прапаганду нават ва ўмовах акупацыі Рэспублікі Беларусь. Таму для нас гэта памяць, для нас гэта прыклад гераізму, для нас гэта сімвал таго, што сучасная беларуская журналістыка і беларускія журналісты не маюць права ў рамках новай, больш тэхналагічнай, са штучным інтэлектам, але ўсё той жа інфармацыйнай вайны супраць інтарэсаў Беларусі, беларускага народа не тое што прайграць, а нават адступіць», — сказаў Андрэй Крывашэеў.

Як прагучала на цырымоніі, для прадстаўнікоў медыйнай супольнасці захаванне гістарычнай праўды і памяці пра загінулых — не толькі чалавечы абавязак, але і частка прафесіянальнай місіі: беражліва працаваць з фактамі, сумленна распавядаць пра мінулае, не дапускаць скажэнняў гістарычнай праўды ў інфармацыйнай прасторы.

Удзельнікі цырымоніі ўшанавалі памяць загінулых у гады Вялікай Айчыннай хвілінай маўчання.

Форум у Гродне сабраў больш за 700 удзельнікаў — гэта прадстаўнікі дзяржаўных СМІ, ідэалагічнай вертыкалі, блогасферы, будучыя журналісты і вядучыя эксперты ў сферы медыякамунікацый. Учора ўдзельнікі пазнаёміліся з прамысловым і турыстычным патэнцыялам Гродна. Сёння яны абмяркуюць выклікі сучаснай журналістыцы, прыярытэты развіцця медыясферы, інфармацыйную бяспеку і трансфармацыю медыярэсурсаў. Таксама сёння вырашыцца галоўная інтрыга — будуць названы імёны пераможцаў і лаўрэатаў XXII Нацыянальнага конкурсу «Залатая літара».

Арганізатары медыяфоруму — Міністэрства інфармацыі і Гродзенскі аблвыканкам.