Памяць аб жахах вайны, зверствах фашыстаў неабходна берагчы і перадаваць будучым пакаленням. Бо перавага адной нацыі або расы над іншай — гэта шлях да кровапраліцця, знішчэння чалавецтва, цывілізацыі, усяго жывога, адзначыў першы намеснік кіраўніка Адміністрацыі Прэзідэнта Беларусі Уладзімір Пярцоў:
— Мы захоўваем гэтую праўду, гэтую памяць, даносім яе да нашых дзяцей для таго, каб тое, што было восем дзесяцігоддзяў таму, не паўтарылася. І каб тыя людзі, хто перапісвае гісторыю, для каго наша праўда — не праўда, і хто спрабуе навязаць гэта моладзі, каб яны бачылі, што мы згуртаваныя. Мы памятаем, цэнім, мы — спадчыннікі народа-пераможцы, — падкрэсліў Уладзімір Пярцоў. — Гэта перамога Чырвонай Арміі на фронце. Гэта перамога партызан і падпольшчыкаў, якія таксама ваявалі і гінулі. Найлепшыя гады свайго жыцця аддавалі за тое, каб мы жылі ў свеце, у прынцыпе былі на гэтай зямлі. Гэта перамога і тых, хто працаваў у тыле па 12-14 гадзін, у тым ліку і дзяцей, жанчын, старых, хто забяспечваў фронт усім неабходным. Мы павінны гэта памятаць. Гэта галоўнае свята, свята жыцця для ўсіх разумных, хто памятае гісторыю. Тых, хто шануе памяць, шануе продкаў.
