«Кляшчы распаўсюджаныя паўсюдна. Сустрэцца з імі можна як у сельскай мясцовасці, так і ў гарадскіх населеных пунктах. Звычайна самы спрыяльны час для кантакту з кляшчамі раніца — з 8.00 да 11.00 і вячэрні час — з 17.00 да 20.00», — сказала Анастасія Ляшкевіч. 

Паводле яе слоў, прамое сонечнае святло, высокая тэмпература, гарачае надвор’е змяншаюць актыўнасць кляшчоў. Для іх больш спрыяльныя пахмурны час сутак і вільготнасць, а гэта якраз вячэрні і ранішні час.

«Кляшчы звычайна размяшчаюцца ў высокай траве і чакаюць свайго карміцеля — гэта можа быць жывёла ці чалавек — на кончыках травінак і потым перамяшчаюцца на адзенне або поўсць жывёлы і могуць укусіць у падпахі, пахвіну, шыю, за вушамі, локцевыя згіны, гэта значыць там, дзе тонкая і пяшчотная скура», — сказала загадчык аддзялення.

Каб засцерагчыся ад кляшчоў, Анастасія Ляшкевіч парэкамендавала насіць адзенне, якое закрывае адкрытыя ўчасткі цела, шыю, а таксама галаўны ўбор. Знаходзячыся ў лесе, на прыродзе, рэкамендуецца праводзіць агляды адно аднаго праз даволі кароткія прамежкі часу, каб своечасова выявіць кляшча. Эксперт параіла выкарыстоўваць рэпеленты. Яны могуць наносіцца як на скуру, так і на адзенне. 

Прафілактыкай прысмоктвання будзе і механічная абарона сваіх прысядзібных участкаў ад кляшчоў: знішчэнне пустазельнай расліннасці, своечасовы пакос высокай травы і яе прыборка, ліквідацыя звалак, сухастою, добраўпарадкаванне тэрыторыі.