Просты, але дзейсны метад прафілактыкі прапанаваў бацькам галоўны пазаштатны дзіцячы спецыяліст траўматолаг-артапед Міністэрства аховы здароўя Падмаскоўя Аляксандр Грыгор’еў, перадае РІА «Новости». Па словах эксперта, каб заўважыць скрытыя пагрозы, дастаткова агледзець кватэру з незвычайнага ракурсу.

«Агледзьце дом вачыма дзіцяці: устаньце на карачкі і прайдзіцеся па пакоях — так вы заўважыце скрытыя небяспекі», — расказаў Аляксандр Грыгор’еў.

Спецыяліст падкрэсліў, што маленькіх дзяцей ні ў якім разе нельга пакідаць без нагляду, асабліва ў ванным пакоі і на кухні, дзе засяроджана найбольшая колькасць крыніц небяспекі.

Урач заклікаў трымаць дзіця далей ад гарачых напояў і пліты. Каб пазбегнуць апёкаў устанавіце варачную паверхню вышэй або выкарыстоўвайце спецыяльныя ахоўныя экраны.

Таксама ён нагадаў аб неабходнасці хаваць запалкі, запальніцы і піратэхніку, а перад купаннем кожны раз правяраць тэмпературу вады.

Асаблівую ўвагу спецыяліст удзяліў бяспецы вокнаў. Каб дзіця не змагло забрацца на падаконнік, неабходна адсунуць ад вокнаў мэблю і абавязкова ўстанавіць блакіратары.

«Маскітная сетка не абароніць ад падзення!» — папярэдзіў траўматолаг.

Усе бытавыя хімікаты і лекі варта прыбіраць у недаступныя для дзяцей месцы, пры гэтым катэгарычна нельга пераліваць небяспечныя вадкасці ў тару з-пад напояў, каб не ўвесці малога ў зман. Электрычныя разеткі неабходна закрыць адмысловымі заглушкамі, а правады схаваць ці надзейна замацаваць на сценах, выключыўшы гульні з падаўжальнікамі.

«Прыбярыце нажы, нажніцы і лязо ў недаступныя скрыні, пазбягайце абрусаў на сталах — малое можа тузануць за край і перакуліць посуд, адразу прыбірайце асколкі, калі нешта разбілася», — дадаў эксперт.

Папярэдзіць траўму заўсёды лягчэй, чым лячыць яе, і ніякія тэхнічныя сродкі не заменяць бацькоўскай увагі. Калі ж няшчасны выпадак адбыўся, медыкі раяць не панікаваць, аб’ектыўна ацаніць стан дзіцяці і пры неабходнасці неадкладна выклікаць хуткую дапамогу.