Работа ў ложку можа выклікаць парушэнні сну і праблемы з апорна-рухальным апаратам, расказаў РІА «Новости »расійскі ўрач-неўролаг, мануальны тэрапеўт, рэабілітолаг Аляксандр Ацяшаў.

«Часта ложак выкарыстоўваюць для чытання кніг, адпачынку днём, а таксама для работы. З-за гэтага могуць узнікаць парушэнні сну, бо мозг асацыюе ложак з тым, што мы ў ім робім. Арганізму неабходна разумець, што ложак — месца для сну, інакш у ім будзе больш складана заснуць», — адзначыў спецыяліст.

Калі чалавек у перыяд «дыстанцыйкі» працуе седзячы ў ложку, у яго сціраецца мяжа паміж рабочай прасторай і прасторай для адпачынку. Могуць узнікаць дакучлівыя думкі аб непраходнай працы, думкі ў сне, думкі пры засынанні, звязаныя з рабочым працэсам. І чалавек, які заснуў у ложку падчас працы, прачнуўся і працягнуў працаваць, будзе абавязкова зведваць больш высокі ўзровень стрэсу, што ў сваю чаргу ў рэшце рэшт прывядзе да эмацыянальнага выгарання.

Урач падкрэсліў, што парушэнні сну — не адзіная праблема, якая ўзнікае падчас работы ў ложку. Гэта звычка таксама ўплывае на апорна-рухальны апарат, паколькі функцыянаванне пазваночніка лепш ажыццяўляецца ў сядзячым становішчы.

«Пры правільным становішчы, седзячы за камп’ютарам, захоўваецца больш-менш правільнае функцыянальнае становішча пазваночніка з вертыкальнай нагрузкай. Калі мы працуем у ложку, нам даводзіцца займаць напаўседзячае становішча, занадта моцна выгінаць шыю наперад або ўпірацца назад на падгалоўнік, у падушку патыліцай. Гэта ў далейшым можа змяніць выправу і становішча шыі, што прывядзе да праблем у шыйным аддзеле і боляў, якія аддаюць у лапаткі і плечы», — папярэдзіў неўролаг.

Паводле яго слоў, работа за ноўтбукам лежачы ў ложку вымушае рукі прымаць нефізіялагічнае становішча: яны альбо ўвесь час знаходзяцца на вісу, альбо адчуваюць празмерную нагрузку з-за ўпору на локці. Гэта прыводзіць да двух наступстваў: па-першае, узрастае нагрузка на суставы, а па-другое, павялічваецца рызыка кампрэсіі локцевага нерва, што ў далейшым можа выклікаць здранцвенне кісцяў.