Развіццё рэгіёнаў і павышэнне дабрабыту грамадзян застаюцца нязменным дзяржаўным прыярытэтам. Ключавую ролю ў гэтым кірунку адыгрываюць органы мясцовага кіравання і самакіравання. Яны выступаюць галоўным сувязным звяном паміж дзяржавай і грамадствам, адказваючы за добраўпарадкаванне, мясцовую эканоміку, сацыяльную інфраструктуру і ўцягванне грамадзян у кіраванне справамі рэгіёна. Эфектыўная работа мясцовых улад і Саветаў дэпутатаў фарміруе аснову для развіцця рэгіёнаў і росту якасці жыцця. Якраз пра паспяховае ўзаемадзеянне, а таксама пра ролю мясцовых дэпутатаў у вырашэнні пытанняў жыццезабеспячэння насельніцтва гаварылі ў Браславе на пасяджэнні пад кіраўніцтвам Старшыні Савета Рэспублікі Наталлі Качанавай. Раз у квартал Савет Рэспублікі, які адказвае за каардынацыю работы дэпутацкага корпуса ўсіх узроўняў, арганізуе падобныя пасяджэнні ў рэгіёнах, каб абмеркаваць найбольш актуальныя пытанні, што ўзнікаюць на месцах, і вывучыць вопыт работы.
«Задачы па павышэнні дабрабыту грамадзян паспяхова вырашаюцца толькі пры ўзаемадзеянні органаў мясцовага
кіравання і самакіравання»
Клопат пра людзей і кантроль за стварэннем годных умоў для кожнага — гэта найважнейшае даручэнне кіраўніка дзяржавы. Без вёскі не будзе краіны, і менавіта таму развіццю рэгіёнаў удзяляецца самая пільная ўвага.
Старшыня Браслаўскага райвыканкама Алена Бабінская на прыкладзе свайго раёна расказала аб важнасці паспяховага ўзаемадзеяння органаў мясцовага кіравання і самакіравання. Яна падкрэсліла, што задача мясцовых органаў улады — развіваць рэгіён у гармоніі з прыродным багаццем. «Адным з прыярытэтаў Праграмы сацыяльна —эканамічнага развіцця на пяцігодку, які стаіць у адным шэрагу з развіццём моцных рэгіёнаў і турыстычнага патэнцыялу, з’яўляецца павышэнне якасці і ўзроўню жыцця, — звярнула ўвагу Алена Бабінская. — Таму на пастаяннай аснове праводзіцца работа па добраўпарадкаванні населеных пунктаў, а іх у нас 593. Раён уваходзіць у пяцёрку раёнаў Віцебскай вобласці па аб’ёмах будаўніцтва жылля. Сёння ўдасканальваецца матэрыяльна —тэхнічная база нашых устаноў адукацыі, аховы здароўя і іншых аб’ектаў сацыяльнай сферы. Прырастаем па аб’ектах гандлю, грамадскага харчавання, ствараюцца новыя бізнесы».
«Сёння мы павінны разумець, што задачы па павышэнні дабрабыту грамадзян паспяхова вырашаюцца толькі пры ўзаемадзеянні органаў мясцовага кіравання і самакіравання. І, вядома, вялікая роля адводзіцца непасрэдна камунікацыі з нашымі людзьмі. Гэта і прыёмы, і дыялогавыя пляцоўкі, сустрэчы ў працоўных калектывах — усё для таго, каб улада была блізкая да народа, — канкрэтызавала Алена Бабінская. — Кіраўнік дзяржавы часта падкрэслівае, што ўлада павінна ісці да народа, а не народ да ўлады, а таксама тое, што сёння ўсе мы павінны жыць праблемамі нашых людзей і своечасова вырашаць іх».
«Узаемадзеянне будуецца на сумесным вырашэнні задач па стварэнні бяспечных і камфортных умоў пражывання грамадзян»
Старшыня Відзаўскага сельсавета Браслаўскага раёна Наталля Залатуха на асабістым прыкладзе падрабязна расказала, як сёння выбудоўваецца ўзаемадзеянне органаў мясцовага кіравання і самакіравання на вёсцы. «Гэта ўзаемадзеянне будуецца на сумесным вырашэнні задач па стварэнні бяспечных і камфортных умоў пражывання грамадзян. Прэзідэнт дакладна вызначыў прыярытэты ўзаемадзеяння: «Усё залежыць ад нас. Будзем лепш працаваць — будзем лепш жыць», — прывяла адзін з найважнейшых тэзісаў беларускага лідара Наталля Залатуха.
Паводле яе слоў, сёння на тэрыторыі Відзаўскага сельсавета размешчаныя 111 населеных пунктаў, абсалютная большасць з якіх — маланаселеныя. Цэнтрам сельсавета з’яўляецца гарадскі пасёлак Відзы. Гэта другі па велічыні населены пункт Браслаўскага раёна. «Дэпутаты нашага сельсавета бяруць актыўны ўдзел у вырашэнні пытанняў жыццезабеспячэння насельніцтва. Штомесяц вядуць прыёмы грамадзян, праводзяць сустрэчы з насельніцтвам, даюць справаздачу перад выбаршчыкамі. Таксама прымаюць удзел у рабоце сесій раённага Савета дэпутатаў і пасяджэннях прэзідыума райсавета і райвыканкама, актыўна на розных узроўнях прадстаўляюць сваю дэпутацкую дзейнасць», — пералічыла старшыня сельсавета.
Дэпутаты Відзаўскага сельсавета і Браслаўскага райсавета адыгрываюць важную ролю ў вырашэнні праблем мясцовага значэння, адзначыла Наталля Залатуха. Па ініцыятыве і з удзелам дэпутатаў праводзяцца работы па абрэзванні, пабелцы дрэў, а ў гарадскім пасёлку Відзы адкрыта публічная бібліятэка, якая мае шырокі дыяпазон рэсурсаў і паслуг для насельніцтва. Акрамя таго, народныя выбраннікі бяруць актыўны ўдзел у работах па добраўпарадкаванні, абсталяванні новых месцаў адпачынку. На вёсцы дэпутаты сельсавета таксама праводзяць тлумачальную работу з людзьмі, вырашаюць пытанні з перабоем водазабеспячэння, а таксама забеспячэння насельніцтва палівам.
«Асноўнай формай дзейнасці мясцовых Саветаў дэпутатаў з’яўляецца ўдзел у сесіях, — адзначыла старшыня сельсавета. — З пачатку работы дзеючага склікання праведзена 21 сесія сельскага Савета дэпутатаў, на якіх было разгледжана 32 пытанні, у тым ліку пытанні добраўпарадкавання населеных пунктаў, умацавання грамадскага парадку, работы ўстаноў адукацыі і культуры, пытанні фарміравання бюджэту. У рабоце сесіі сельскага Савета дэпутатаў удзельнічаюць старшыня Браслаўскага раённага Савета дэпутатаў, дэпутаты райсавета, кіраўнікі структурных падраздзяленняў райвыканкама, кіраўнікі раённых службаў, арганізацый, размешчаных на тэрыторыі сельсавета, што дае магчымасць атрымліваць дакладную інфармацыю аб стане спраў у раёне».
«Ва ўзаемадзеянні з раённымі арганізацыямі звароты вырашаюцца аператыўна»
Акрамя таго, на пасяджэнні Відзаўскага сельвыканкама штомесяц разглядаюцца найбольш сацыяльна значныя пытанні. «Значная роля ў дзейнасці Саветаў дэпутатаў адводзіцца рабоце з насельніцтвам па месцы жыхарства, важным злучальным звяном у якой з’яўляецца орган тэрытарыяльна —грамадскага самакіравання, — паведаміла Наталля Залатуха. — Старэйшынамі вёсак выбраныя 23 чалавекі. Гэта людзі, якія карыстаюцца заслужаным аўтарытэтам і павагай у мясцовых жыхароў, якіх хвалююць праблемы аднавяскоўцаў, добраўпарадкаванне населеных пунктаў. Штоквартальна найбольш актыўныя старэйшыны заахвочваюцца матэрыяльнымі выплатамі. Разам з дэпутатамі старэйшыны ўдзельнічаюць у правядзенні сходаў грамадзян, прымаюць удзел у рабоце сесій Саветаў дэпутатаў».
Народныя выбраннікі асаблівую ўвагу ўдзяляюць зваротам грамадзян. «Усе звароты грамадзян разглядаюцца сельвыканкамам ва ўстаноўленыя заканадаўствам тэрміны. Рэгулярна паступаюць звароты грамадзян на гарачую тэлефонную лінію па пытаннях даведачна —кансультацыйнага характару, — паведаміла Наталля Залатуха. — Ва ўзаемадзеянні з раённымі арганізацыямі дадзеныя звароты вырашаюцца аператыўна. Па заявах грамадзян у гэтым годзе ажыццёўлена больш за 800 адміністрацыйных працэдур. Найбольш часта грамадзяне звяртаюцца за выдачай даведак аб займаемым у дадзеным населеным пункце жылым памяшканні, складзе сям’і».
Саветам дэпутатаў і мясцовымі арганізацыямі праводзіцца работа па падтрымцы асабістых падсобных гаспадарак грамадзян, што маюць вялікае значэнне ў забеспячэнні жыхароў сельскагаспадарчай прадукцыяй, спрыяюць павышэнню занятасці і даходаў грамадзян. Такім чынам, цеснае ўзаемадзеянне мясцовых органаў улады з прадпрыемствамі і арганізацыямі канкрэтнага рэгіёна спрыяе стварэнню камфортных умоў для пражывання і развіцця чалавека.
Данііл ХМЯЛЬНІЦКІ
