Галоўным следчым упраўленнем Следчага камітэта Рэспублікі Беларусь сумесна з Дэпартаментам фінансавых расследаванняў Камітэта дзяржаўнага кантролю спынена супрацьпраўная дзейнасць прадстаўнікоў кампаніі «Bayer», звязаная з ухіленнем ад выплаты буйной сумы падаткаў.

Як паведаміў аддзел інфармацыі і сувязі з грамадскасцю Следчага камітэта, следствам атрымана інфармацыя, што кіраўнікі замежных кампаній «Bayer» і АТ «БАЙЕР», пры дапамозе іншых асоб, са студзеня 2020 года па сакавік 2026 года, арганізавалі і ажыццяўлялі прадпрымальніцкую дзейнасць без рэгістрацыі пастаяннага прадстаўніцтва названага таварыства па рэалізацыі на тэрыторыі Беларусі сродкаў аграхімічнай абароны раслін і фармацэўтыкі, што з’яўлялася прамым парушэннем дзеючага заканадаўства.

Для прыкрыцця супрацьпраўнай дзейнасці яны стварылі ТАА «Баер ВР» і шэраг прадстаўніцтваў замежных кампаній. 

Фігуранты праігнаравалі той факт, што атрыманыя грашовыя сродкі падлягаюць падаткаабкладанню і ўхіліліся ад выплаты падаткаў на агульную суму больш за 50 мільёнаў рублёў. Пры гэтым, у перыяд злачыннай дзейнасці з беларускіх рахункаў групе кампаній «Bayer» пералічана больш за 1,35 мільярда рублёў.

У рамках расследавання крымінальнай справы затрыманы 10 чалавек. Сярод іх — грамадзяне Рэспублікі Беларусь і Расійскай Федэрацыі. Да 7 фігурантаў прыменена мера стрымання ў выглядзе ўзяцця іх пад варту. Іх дзеянні кваліфікаваны следчымі па арт. 243 (ухіленне ад выплаты падаткаў) Крымінальнага кодэкса Беларусі.

У ходзе правядзення неадкладных следчых дзеянняў, атрыманы неабвержныя доказы аб датычнасці ўсіх падазраваемых да ўчынення злачынстваў. Праведзены вобыскі, канфіскавана дакументацыя, якая пацвярджае супрацьпраўную дзейнасць, сярод якой — ценявыя ўлікі, спецыфікацыі, дагаворы, заяўкі, даныя паставак і зводныя файлы.

Фігуранты супрацоўнічаюць са следствам, даюць прызнальныя паказанні, у тым ліку ў адносінах да кіраўніцтва замежнай кампаніі. У мэтах кампенсацыі шкоды накладзены арышты на аб’екты нерухомасці і транспартныя сродкі кампаніі, рахункі таварыства і замежных прадстаўніцтваў, шматлікую рухомую і нерухомую маёмасць падазраваных на суму не менш за 8 мільёнаў рублёў.

Расследаванне крымінальнай справы працягваецца. Аналізуецца дзейнасць замежнай кампаніі і яе прадстаўніцтваў на тэрыторыі Беларусі з мэтай устанаўлення ўсіх абставін супрацьпраўнай дзейнасці.