У перыяд восеньскіх канікул для навучэнцаў арганізуюць экскурсіі ў музей Мінскай гарадской арганізацыі АСВОД. Дзецям расказваюць пра правілы паводзін каля вады ў халодную пару года, знаёмяць з вадалазным абсталяваннем, катарамі, лодкамі і іншымі плаўсродкамі. На спецыяльных манекенах школьнікі вучацца асновам аказання першай дапамогі, а інтэрактыўныя заданні дапамагаюць замацаваць атрыманыя веды.

Прафілактычныя сустрэчы таксама праходзяць у працоўных калектывах прадпрыемстваў і арганізацый сталіцы, школах, гімназіях і каледжах. Спецыялісты тлумачаць, як паводзіць сябе паблізу вадаёмаў, што рабіць, калі праваліўся пад лёд, і якім чынам аказаць першую дапамогу пацярпеламу.

Заняткі будуюцца ў фармаце дыялогу: удзельнікі разбіраюць магчымыя надзвычайныя сітуацыі, задаюць пытанні і адпрацоўваюць алгарытмы дзеянняў. Для школьнікаў і студэнтаў выкарыстоўваюць відэаматэрыялы і практычныя заданні, а педагогам і работнікам прадпрыемстваў прадастаўляюць метадычныя памяткі для далейшай прафілактычнай работы.

Асобны кірунак — патруляванне вадаёмаў. Цяпер рэйды Мінскай гарадской арганізацыі АСВОД арыентаваны перш за ўсё на месцы масавай рыбалкі. Удзельнікі патрулёў гутараць з рыбакамі, нагадваюць ім пра правілы бяспекі, правяраюць наяўнасць выратавальных камізэлек і падручных сродкаў выратавання. Рыбакам таксама раздаюць памяткі з рэкамендацыямі наконт бяспечных паводзін.

АСВОД нагадвае: у халодную пару года нават звыклы адпачынак каля вадаёма можа быць звязаны з сур’ёзнай рызыкай. Захаванне правілаў бяспекі і асцярожнасць дапамагаюць прадухіліць трагедыі.