Заключны матч каляндарнага года нашы валейбалісткі праводзілі ў Краснаярску, дзе іх прымаў «Енісей». Першы і другі сэты прайшлі з прыкметнай перавагай сталічнага клуба і скончыліся на карысць беларусак — 25:20 і 25:17. У трэцім гульнявым адрэзку нашы дзяўчаты мелі два матчболы, але закрыць гульню не змаглі і ў выніку аддалі партыю — 24:26. 

Акрыяць ад гэтай няўдачы госці не здолелі, два наступныя сэты аказаліся прайграныя з вынікамі 19:25 і 10:15. У выніку паражэнне «Мінчанкі» з лікам 2:3, якое стала для каманды восьмым запар. Папярэдні раз беларускі святкавалі поспех у Суперлізе яшчэ ў пачатку лістапада.

Сталічны клуб застаўся на апошнім, 14-м месцы ў турнірнай табліцы, набраўшы ўсяго 8 ачкоў у 15 турах. Наступны паядынак у жаночым чэмпіянаце Расіі па валейболе «Мінчанка» правядзе ў Палацы спорту «Уручча» 6 студзеня супраць «Ленінградкі», якая ідзе на шостай пазіцыі.