У цэнтры ўвагі Аляксандра Вальфовіча, які з’яўляецца ўпаўнаважаным прадстаўніком кіраўніка дзяржавы ў Гродзенскай вобласці, быў ход уборачнай кампаніі.

Дзяржаўнага сакратара Савета Бяспекі цікавіў тэхнічны стан сельскагаспадарчай і іншай тэхнікі, ці ў поўнай меры задзейнічаны збожжаўборачныя камбайны, энерганасычаная тэхніка, ці спраўляюцца зернесушыльныя комплексы з аб’ёмамі збожжа, як ідуць справы з механізатарскімі кадрамі.

У гутарцы з кіраўніцтвам раёна, сельгасарганізацый, прадстаўнікамі праваахоўных органаў былі таксама абмеркаваны праблемныя пытанні, якія ўзнікаюць, і якія меры прымаюцца для іх ліквідацыі. Асаблівая ўвага была ўдзелена недапушчэнню фактаў безгаспадарчасці, крадзяжу гаруча-змазачных матэрыялаў, сродкаў абароны раслін, запасных частак да сельгастэхнікі, прыпісак ураджайнасці.

Непасрэдна ў полі ўдзельнікі жніва дзяліліся з дзяржаўным сакратаром Савета Бяспекі сваімі поспехамі.

«Настрой у людзей баявы, прычым не толькі ў сельгасарганізацыях Ашмянскага раёна, — адзначыў Аляксандр Вальфовіч. — За апошнія дні я сустракаўся з аграрыямі Свіслацкага, Зэльвенскага, Смаргонскага і іншых раёнаў вобласці. Кожны з іх душой хварэе за даручаную справу, уносіць свой уклад у тое, каб вывесці Гродзеншчыну ў лідары».

Па словах Аляксандра Вальфовіча, паспяхова працуюць разам з аграрыямі і вайскоўцы, ратавальнікі — у якасці камбайнераў, вадзіцеляў, трактарыстаў-машыністаў, і ў гэтыя дні дапамога людзей у пагонах вельмі важная.