«Пасля паведамлення аб смерці Рымскага Пантыфіка Францыска, як прадугледжана ў Ordo Exsequiarum Romani Pontificis (дакуменце аб парадку пахавання пантыфіка — рэд), сёння ўвечары, у панядзелак, 21 красавіка, у 20:00 (21.00 бел.), яго Высокапраасвяшчэнства кардынал Кевін Джозеф Фарэл, камерленга Царквы, узначаліць цырымоніі пасведчання смерці і змяшчэння цела ў труну», — гаворыцца ў паведамленні.

Згодна з традыцыяй, камерленга павінен тройчы ўдарыць па лбе сярэбраным малаточкам і папрасіць адгукнуцца. Толькі пасля гэтага ён прамаўляе сакраментальную лацінскую формулу Vere Papa mortuus est (Папа сапраўды мёртвы).

Пасля абраду ў Ватыкане пачынаецца перыяд вакантнага прастола (sede vacante). Фактычна месцазахоўнікам Апостальскага прастола становіцца кардынал-камерленга, ён жа часова выконвае абавязкі суверэна горада-дзяржавы Ватыкан.

Магчымай прычынай смерці папы рымскага Францыска стаў інсульт, пішуць газеты Corriere della Sera і Repubblica са спасылкай на крыніцы.

«Прычынай смерці папы Францыска, як мяркуецца, стаў інсульт. У найбліжэйшыя некалькі гадзін Святы прастол апублікуе афіцыйную заяву з указаннем прычыны смерці», — гаворыцца ў паведамленні Corriere.

Наступным папам можа стаць выхадзец з Афрыкі, Італіі, Шры-Ланкі ці ЗША, піша New York Post.

«Галоўныя кандыдаты вар’іруюцца ад прыхільнікаў „неамадэрнісцкіх“ тэалагічных пазіцый да больш кансерватыўных», — гаворыцца ў паведамленні.

У якасці прэтэндэнтаў аўтары называюць філіпінскага кардынала Луіса Тагле, італьянскага прэлата П’етра Параліна, які прытрымліваецца кансерватыўных пазіцый і падтрымлівае супрацоўніцтва царквы з Кітаем, а таксама французскага прэтэндэнта Жан-Марка, якога ў матэрыяле назвалі «любімым» кардыналам Францыскам.

Акрамя гэтага, сярод магчымых прэтэндэнтаў паказваюцца галандскі прэлат Вілем Якаб Эйк, кардынал Малкольм Ранджыт са Шры-Ланкі і былы ватыканскі чыноўнік з Гвінеі Роберт Сара, які публічна выказваў незадаволенасць благаслаўленнем для аднаполых пар. Гэтыя заявы зрабілі яго адкрытым крытыкам папы Францыска, што схіліла да яго кансерватараў. Ён таксама можа стаць першым афрыканскім папам з V стагоддзя.

Верагодна, што той, каго абяруць на змену папе Францыску <...> верне Каталіцкую царкву да ідэалагічнага цэнтра«, — гаворыцца ў паведамленні.

На працягу 15–20 дзён пасля смерці папы ў Ватыкане збярэцца канклаў з тых, хто мае права голасу для выбару новага кіраўніка Рымска-Каталіцкага касцёла. Пасля некалькіх тураў галасавання абяруць двух кандыдатаў: той з іх, хто атрымае дзве трэці галасоў, стане наступным папам, удакладняе NYP.

Папа Рымскі Францыск памёр у панядзелак раніцай ва ўзросце 88 гадоў. У сярэдзіне лютага яго шпіталізавалі ў рымскую клініку «Джэмелі» для лячэння бранхіту, а затым абследаванні паказалі пачатак двухбаковай пнеўманіі. Папа правёў у шпіталі пяць тыдняў, перанёс чатыры дыхальныя крызісы, яго жыццю двойчы пагражала небяспека.

Па дадзеных, якія прыводзяць газеты Repubblica і Corriere della Sera са спасылкай на крыніцы, прычынай смерці папы Францыска стаў інсульт.