Завучванне вершаў, вывучэнне замежных моў і пісьмо левай рукой (для праўшы) з'яўляюцца натуральнымі тэхнікамі развіцця разумовай, мазгавой дзейнасці, расказаў ТАСС віцэ-прэзідэнт Расійскай акадэміі навук, дырэктар ФДБНУ «Расійскі цэнтр неўралогіі і нейранавук» акадэмік Міхаіл Пірадаў.
«Ёсць цэлы шэраг тэхнік, якія рэзка "ўзрушваюць" мозг. Адзін з простых прыкладаў для праўшы — вучыцца пісаць левай рукой. Гэта вельмі магутная нагрузка на мозг, якая прымушае яго перабудоўваць сувязі. Мы на 90 % успрымаем свет з дапамогай зроку. Калі яго выключыць, пачынаюць развівацца іншыя каналы. Але ў бытавым, бяспечным варыянце элементы сэнсорнай дэпрывацыі таксама могуць быць карысныя: напрыклад, хадзіць па звыклай кватэры з павязкай на вачах, акуратна, не рызыкуючы атрымаць траўму. Гэта таксама стымулюе мозг», — сказаў ён.
У той жа час акадэмік Пірадаў заклікаў асцярожна ставіцца да экстрэмальных практык індыйскіх ёгаў.
«У ёзе, напрыклад, ёсць практыка працяглага знаходжання ў поўнай цемры і цішыні: чалавека змяшчаюць у вузкую прастору без святла, з мінімальнымі ўмовамі для выжывання, і некаторыя праводзяць там месяцы і гады. У іх неверагодна абвастраюцца слых, нюх, тактыльная адчувальнасць. Да падобных экстрэмальных практык я б заклікаў ставіцца асцярожна. Гісторыя з фільмам «Індыйскія ёгі — хто яны?» паказала, да чаго прыводзіць некантраляванае перайманне: людзі без падрыхтоўкі пачыналі станавіцца на галаву і атрымлівалі інсульты», — сказаў Міхаіл Пірадаў.
Таксама, па словах акадэміка, класічнымі спосабамі развіцця мозгу з'яўляюцца завучванне вершаў на памяць, вывучэнне замежных моў, засваенне новых навыкаў.
«Усё гэта выклікае "ўзрушэнне", прымушае мозг фарміраваць новыя сувязі і тым самым падтрымлівае яго працаздольнасць», — сказаў акадэмік Пірадаў.
