19-20 лістапада 2026 г. у Віцебску пройдзе XII навукова-практычная канферэнцыя «Віцебскі край». Арганізатары — Віцебская абласная бібліятэка імя У. І. Леніна, Інстытут гісторыі Нацыянальнай акадэміі навук Беларусі, Віцебскі абласны краязнаўчы музей. Канферэнцыя прымеркавана да 175-годдзя з дня нараджэння легендарнага даследчыка даўніны А. П. Сапунова.
Падзею анансіруе загадчык аддзела краязнаўства Віцебскай абласной бібліятэкі Ларыса Рагачова:
Канферэнцыя вызначаецца асаблівай атмасферай. Па традыцыі ў ёй удзельнічаюць даследчыкі гісторыі Віцебска, Віцебшчыны з розных куточкаў нашай краіны. Сёлета мы збіраемся разгледзець наступныя тэматычныя абсягі: «Аляксей Парфёнавіч Сапуноў. Асоба, лёс, спадчына»; «Віцебская вобласць у кантэксце гісторыі краіны»; «Падзеі Вялікай Айчыннай вайны на Віцебшчыне»; «Гісторыя і культура Віцебшчыны (ад старажытнасці да сучаснасці)»; «Малая радзіма: гісторыя родных мясцін»; «Гістарычнае краязнаўства»; «Этнаграфія і фальклор»; «Літаратуразнаўства і мовазнаўства»; «Мастацтвазнаўства»; «Праблемы архівазнаўства і археаграфіі»; «Бібліятэчна-бібліяграфічнае краязнаўства»; «Музейнае краязнаўства»; «Экскурсійная справа і краязнаўства»; «Царкоўнае краязнаўства»; «Краязнаўства ў вучэбна-выхаваўчым працэсе». Ужо пададзены заяўкі для дакладаў і выступленняў літаральна па ўсіх кірунках.
Па выніках канферэнцыі па традыцыі будзе выдадзены калектыўны зборнік «Віцебскі край». Сабраныя разам такія кнігі ўяўляюць сапраўдную бібліятэку па віцебскім радзімазнаўстве.
Мікола БЕРЛЕЖ
