Галоўны старт сезона з 12 па 16 жніўня прыме нямецкі Франкфурт-на-Майне. Беларускія грацыі прымуць удзел у чэмпіянаце свету ўпершыню за пяць гадоў. У індывідуальных спаборніцтвах заяўлены 100 спартсменак з 72 краін, сярод іх — нашы Аліна Гарнасько і Дар'я Вярэніч. У групавых практыкаваннях выступяць прадстаўніцы 42 краін, у тым ліку Нацыянальная каманда Беларусі.

У 2026 годзе Гарнасько заваявала серабро чэмпіянату Еўропы ў праграме з абручом, была прызёрам этапаў Кубка свету і Кубка выкліку, а таксама перамагла на турніры Гран-пры ў Францыі. Вярэніч стала чэмпіёнкай краіны ў мнагабор'і, выйграла міжнародныя спаборніцтвы ў Германіі і паднялася на п'едэстал Кубка Еўропы.

Каманда Беларусі ў групавых практыкаваннях (Паліна Аляксандрава, Сафія Барысевіч, Валерыя Мальковіч, Ганна Шакун, Кір'яна Шаўцова, Таісія Ярчак) у бягучым сезоне ўваходзіла ў тройку лепшых на этапах Кубка свету і Кубка выкліку, узяла серабро ў кампазіцыі з пяццю мячамі на кантынентальным чэмпіянаце.

На папярэднім для беларускіх гімнастак планетарным форуме, які праходзіў у Японіі ў 2021 годзе, нашы дзяўчаты заваявалі сем узнагарод (1-2-4). Пяць медалёў з турніру прывезла Аліна Гарнасько, якая атрымала перамогу ў практыкаванні са стужкай, стаўшы тым самым першай у XXI стагоддзі чэмпіёнкай свету з Беларусі.